भोर, दि.२० : ( सतीश गायकवाड )
भोर उपजिल्हा रुग्णालयात अजूनही ऑनलाईन मॅरेज सर्टिफिकेटची सुविधा उपलब्ध नसल्यामुळे नागरिकांना मोठ्या अडचणींना सामोरे जावे लागत आहे. वारंवार हेलपाटे मारूनही ही समस्या सुटत नसल्याने नागरिकांत तीव्र नाराजी व्यक्त होत आहे.
लग्नानंतर महिलांना आधार कार्डावर नाव बदलण्यासाठी ऑनलाईन मॅरेज सर्टिफिकेट आवश्यक आहे. केंद्र शासनाच्या आधार पोर्टलवर नाव बदलण्यासाठी बारकोड असलेले प्रमाणपत्र बंधनकारक आहे. मात्र भोर उपजिल्हा रुग्णालयातून दिली जाणारी प्रमाणपत्रे अद्यापही फक्त ऑफलाईन स्वरूपात असल्याने अनेकांना शासकीय योजनांचा लाभ मिळत नाही.
यासंदर्भात भोर उपजिल्हा रुग्णालयातील डॉ. साबणे यांनी सांगितले की, “राज्य शासनाकडून ऑनलाईन सर्टिफिकेटसंदर्भात कोणतीही मार्गदर्शक तत्त्वे आलेली नाहीत. आदेश आल्यानंतरच आम्ही ऑनलाईन प्रमाणपत्र देऊ शकतो.”
दरम्यान, नागरिकांनी महाराष्ट्र शासनाच्या टोल फ्री क्रमांकावर तक्रार नोंदवली असता, “सध्या केवळ ग्रामपंचायतींना ऑनलाईन सर्टिफिकेट देण्याचा अधिकार आहे. शहरी भागातील नागरिकांना उपजिल्हा रुग्णालयातून ऑनलाईन सुविधा मिळणार नाही,” असे उत्तर मिळाल्याचे त्यांनी सांगितले.
या परिस्थितीमुळे अनेक कुटुंबे शासकीय योजनांपासून वंचित राहत असून, विशेषतः गर्भवती महिलांना आरोग्यविषयक योजनांचा लाभ न मिळाल्याने शासनाच्या दुर्लक्षाबद्दल संताप व्यक्त केला जात आहे.
