लॉटरी ३ सप्टेंबर ला निघणार …
मुंबई, दि.१३ : मंगेश म्हात्रे
म्हाडा कोकण गृहनिर्माण व क्षेत्रविकास मंडळातर्फे ठाणे, वसई, सिंधुदुर्ग व बदलापूर परिसरात एकूण ५,२८५ सदनिका व ७७ भूखंड विक्रीसाठी सोडत जाहीर करण्यात आली आहे. या सोडतीसाठी ऑनलाईन अर्ज प्रक्रिया १४ जुलैपासून सुरू होणार असून, संगणकीय सोडत ३ सप्टेंबर रोजी जाहीर होईल.
या योजनेचा ‘गो-लाइव्ह’ शुभारंभ १४ जुलै २०२५ रोजी दुपारी १ वाजता म्हाडाचे उपाध्यक्ष संजिव जयस्वाल यांच्या हस्ते होणार आहे. अर्ज नोंदणीसाठी अंतिम मुदत १३ ऑगस्ट २०२५ रात्रीपर्यंत ठेवण्यात आली आहे. तर अर्जांसोबतची अनामत रक्कम १४ ऑगस्ट २०२५ पर्यंत भरणे आवश्यक आहे. पात्र अर्जदारांची अंतिम यादी १ सप्टेंबर रोजी म्हाडाच्या अधिकृत संकेतस्थळावर प्रसिद्ध होईल.
संगणकीय सोडत ३ सप्टेंबर रोजी सकाळी १० वाजता ठाण्याच्या डॉ. काशीनाथ घाणेकर नाट्यगृहात होईल. निकाल तात्काळ अर्जदारांना मोबाईल एसएमएस, ई-मेल व अॅपद्वारे कळवला जाणार आहे.
कोकण मंडळाने यावेळी विविध गृहनिर्माण योजनांअंतर्गत सदनिका व भूखंडांची ही सोडत जाहीर केली आहे. त्यामध्ये २०% सर्वसमावेशक योजनेतील ५६५ सदनिका, एकात्मिक शहर गृहनिर्माण योजनेतील ३,००२ सदनिका, विखुरलेल्या सदनिका व ५०% परवडणाऱ्या घरांची अनुक्रमे १,६७७ व ४१ सदनिका तसेच ७७ भूखंडांचा समावेश आहे.
- अर्ज प्रक्रियेसाठी म्हाडाच्या https://housing.mhada.gov.in
या संकेतस्थळावर तसेच IHLMS 2.0 या अॅपद्वारे नोंदणी करता येईल. अर्जदारांना मार्गदर्शनासाठी माहितीपुस्तिका, व्हिडीओ व हेल्पफाईल संकेतस्थळावर उपलब्ध आहेत. अर्ज करताना कुणाही दलाल, एजंट अथवा मध्यस्थाच्या प्रलोभनांना बळी पडू नये, असा इशाराही मंडळाच्या मुख्य अधिकारी रेवती गायकर यांनी दिला आहे. अर्ज प्रक्रियेत येणाऱ्या अडचणींसाठी हेल्पलाईन क्रमांक ०२२-६९४६८१०० उपलब्ध आहे.
