कैरो, इजिप्त. दि .६ . प्रतिनिधी
प्राचीन संस्कृतीचा वारसा लाभलेल्या इजिप्तची राजधानी कैरो येथे पार पडलेल्या दिमाखदार आंतरराष्ट्रीय सोहळ्यात ठाणे जिल्ह्याचे नाव जागतिक पातळीवर उजळले. साहित्य व शैक्षणिक क्षेत्रातील उल्लेखनीय योगदानाबद्दल डॉ. प्रा. प्रदीप ढवळे यांना मानाचा ‘लोकमत वन वर्ल्ड’ पुरस्कार प्रदान करण्यात आला.
या आंतरराष्ट्रीय व्यासपीठावर ठाणे जिल्ह्यातून झालेली ही निवड राज्याच्या शैक्षणिक, साहित्यिक व सांस्कृतिक क्षेत्रासाठी भूषणावह ठरली आहे. हा सोहळा केवळ सन्मानाचा नसून भारत आणि इजिप्त यांच्यातील दृढ होत चाललेल्या सांस्कृतिक व वैचारिक संबंधांचे प्रतीक ठरला.
नाईल नदीच्या काठी वसलेल्या या ऐतिहासिक शहरात भारतीय गुणवत्तेचा सन्मान होणे, हे दोन्ही देशांमधील शैक्षणिक आणि वैचारिक देवाणघेवाणीला नवी दिशा देणारे मानले जात आहे. भारत–इजिप्त यांच्यातील ऐतिहासिक मैत्रीचे प्रतिबिंब ‘वन वर्ल्ड’ या संकल्पनेतून अधोरेखित झाले.
लोकमत समूहाचे अध्यक्ष डॉ. विजय दर्डा यांच्या मार्गदर्शनाखाली आयोजित या सोहळ्यास भारतीय उद्योग, कला, साहित्य, शैक्षणिक व सामाजिक क्षेत्रातील मान्यवर उपस्थित होते. प्रसिद्ध अभिनेते बोमन इराणी, श्रीमती अमृता फडणवीस, अभिनेत्री सौंदर्या शर्मा यांची उपस्थिती लाभल्याने सोहळ्याची शोभा अधिकच वाढली.
पुरस्कार स्वीकारताना भावना व्यक्त करताना डॉ. प्रा. प्रदीप ढवळे म्हणाले,
“हा पुरस्कार मी पद्मश्री मधु मंगेश कर्णिक तसेच माझ्या सर्व हितचिंतकांना अर्पण करतो. आई-वडील आणि कुटुंबीयांच्या पाठबळामुळेच समाजासाठी कार्य करता आले.”
इजिप्तसारख्या ऐतिहासिक व भव्य शहरात हा सन्मान मिळणे हे आपले भाग्य असल्याची भावना त्यांनी व्यक्त करत लोकमत समूहाचे मनःपूर्वक आभार मानले.
साहित्यिक मूल्यांचे जतन आणि शैक्षणिक संस्थांच्या सक्षमीकरणासाठी केलेल्या योगदानाची दखल घेत ही निवड करण्यात आली आहे.
इजिप्तच्या भूमीत भारतीय कर्तृत्वाचा झेंडा फडकल्याने ठाणे जिल्ह्यासह राज्यभरातून त्यांच्यावर अभिनंदनाचा वर्षाव होत आहे.
