रविवारी पैठण बंदची हाक…!
पैठण, दि. २८ (प्रतिनिधी)
येथील अखिल भारतीय मराठा महासंघाचे प्रदेश उपाध्यक्ष आणि सामाजिक कार्यकर्ते अतिश गायकवाड यांच्यावर मंगळवारी (दि. २७ मे) सायंकाळी साडेसहा वाजण्याच्या सुमारास कोर्ट रोडवरील हुतात्मा स्मारकाच्या मागे पाच ते सहा जणांच्या टोळक्याने प्राणघातक हल्ला केला.
लाठ्या, काठ्या आणि लोखंडी रॉडने करण्यात आलेल्या या हल्ल्यात गायकवाड गंभीर जखमी झाले असून, त्यांना तातडीने छत्रपती संभाजीनगर येथील खासगी रुग्णालयात हलवण्यात आले आहे. सध्या त्यांची प्रकृती स्थिर असल्याचे रुग्णालयातून सांगण्यात आले.
हल्ल्याच्या वेळी परिसरात अंधार आणि पावसाचे वातावरण असल्यामुळे हल्लेखोर अंधाराचा फायदा घेत पसार झाले. घटनास्थळी उपस्थित स्थानिक नागरिकांनी माजी नगराध्यक्ष व उद्धव ठाकरे गटाचे नेते दत्ताभाऊ गोर्डे यांना माहिती दिल्यानंतर त्यांनी तत्काळ कार्यकर्त्यांसह घटनास्थळी धाव घेतली आणि गायकवाड यांना रुग्णवाहिकेद्वारे रुग्णालयात दाखल केले.
या भीषण हल्ल्यामुळे पैठण शहरात तीव्र संतापाची लाट उसळली असून, माजी नगराध्यक्ष दत्ता गोर्डे, साईनाथ कर्डिले, किशोर सदावर्ते, किशोर शिरवत, शुभम गायकवाड यांच्यासह अनेकांनी जोरदार निषेध करत आरोपींना तात्काळ अटक करण्याची मागणी केली आहे.
या घटनेचा निषेध म्हणून रविवारी ( ता.१ जून) रोजी पैठण शहर बंद चे आवाहन पैठण तालुक्यातील सर्व राजकीय व सामाजिक संघटनाच्या वतीने करण्यात आले आहे.
