रायगड प्रेस क्लबचे पोलीस अधीक्षकांना निवेदन…..
मुंबई, दि.८ : अजय मगरे
साम टीव्हीचे पत्रकार आणि रायगड प्रेस क्लबचे सदस्य विकास मिरगणे यांना सहाय्यक पोलीस निरीक्षक शांताराम नाईक यांनी मारहाण केल्याप्रकरणी संबंधित अधिकाऱ्यावर तातडीने कारवाई करावी, अशी मागणी करत रायगड जिल्हा प्रेस क्लबच्या पदाधिकाऱ्यांनी नुकतेच जिल्हा पोलीस अधीक्षक आचल दलाल यांना निवेदन सादर केले.
गणेश विसर्जनाचे वार्तांकन करताना मुंबई गिरगाव येथे गाडी पार्किंगच्या कारणावरून सहाय्यक निरीक्षक नाईक यांच्याशी बाचाबाची झाली. या वादातून निरीक्षक नाईक यांनी पत्रकार विकास मिरगणे यांना कानशिलात लगावली. या प्रकाराचा तीव्र निषेध नोंदवत पत्रकारांवर हात उचलणाऱ्या पोलीस अधिकाऱ्यावर कठोर कारवाई करावी, अशी मागणी निवेदनात करण्यात आली आहे.
या वेळी जिल्हा प्रेस क्लबचे अध्यक्ष प्रशांत गोपाळे, कार्याध्यक्ष संजय मोहिते, उपाध्यक्ष मोहन जाधव, पत्रकार हल्ला कृती समितीचे जिल्हा संघटक विजय मोकल, माजी अध्यक्ष भारत रांजणकर, संघटक कमलेश ठाकूर, तसेच अमोल जैन, गणेश पवार, राजेश भोस्तेकर, ज्ञानेश्वर बागडे आदी पत्रकार उपस्थित होते.
सुप्रिंटेंडंट आचल दलाल यांनी निवेदन वरिष्ठ कार्यालयाकडे पाठविण्याचे आश्वासन दिले. दरम्यान, या घटनेच्या निषेधार्थ मुंबईतील पत्रकार संघटनाही राज्याच्या पोलिस महासंचालकांकडे निवेदन सादर करणार आहेत.
अधिक माहितीसाठी: कमलेश ठाकूर प्रसिद्धीप्रमुख, मराठी पत्रकार परिषद – रायगड जिल्हा
संपर्क : ९४२२०९४७७६
