नागरिकांना दिलासा
नगरसेविका एकता भोईर यांच्या पुढाकाराने प्रशासनाची तातडीची हालचाल
ठाणे,दि.२९.( अजय मगरे )
वागळे इस्टेट परिसरातील अंबिका नगर येथे अनेक वर्षांपासून उभे असलेले धोकादायक पिंपळाचे झाड अखेर हटविण्याची कारवाई सुरू करण्यात आली आहे. झाडाच्या वाढलेल्या फांद्या परिसरातील घरांवर कोसळण्याची भीती निर्माण झाल्याने नागरिकांमध्ये भीतीचे वातावरण होते. संभाव्य जीवित व वित्तहानी टाळण्यासाठी स्थानिक नागरिकांनी प्रशासनाकडे सातत्याने मागणी केली होती.
नागरिकांच्या सुरक्षिततेला प्राधान्य देत तसेच स्थानिक रहिवाशांची संमती घेऊन संबंधित विभागामार्फत झाड हटविण्याची कारवाई हाती घेण्यात आली. या कारवाईमुळे परिसरातील रहिवाशांनी समाधान व्यक्त केले असून भविष्यातील संभाव्य दुर्घटना टळणार असल्याचा विश्वास व्यक्त केला आहे.
ही कारवाई स्थानिक नगरसेविका एकता भोईर यांच्या मार्गदर्शनाखाली सुरू असून, नागरिकांच्या तक्रारीची तातडीने दखल घेत प्रशासनाने सकारात्मक पाऊल उचलल्याबद्दल स्थानिकांनी समाधान व्यक्त केले. तसेच परिसरातील इतर धोकादायक झाडांचेही सर्वेक्षण करून वेळेत आवश्यक कारवाई करण्याची मागणी नागरिकांनी प्रशासनाकडे केली आहे.
