मुंबई, दि.२१ ( दिलीप गायकवाड )
पुणे जिल्ह्यातील पुरंदर आणि अहमदनगर जिल्ह्यातील कोपरगाव येथे सुसज्ज बहुउद्देशीय तालुका क्रीडा संकुल उभारण्यात यावे, असे निर्देश क्रीडा व युवक कल्याण मंत्री दत्तात्रय भरणे यांनी दिले.
या संदर्भात आज मंत्रालयात बैठकीचे आयोजन करण्यात आले होते. बैठकीस आमदार विजय शिवतारे, आमदार आशुतोष काळे, अपर मुख्य सचिव अनिल डिग्गीकर, उपसचिव श्री. पांढरे आदी उपस्थित होते.
बैठकीत मंत्री भरणे म्हणाले की, पुरंदर क्रीडा संकुलात बहुउद्देशीय सभागृह, योगा हॉल, जिम्नॅस्टिक सुविधा, चेंजिंग रूम, बॅडमिंटन हॉल तसेच स्पर्धा परीक्षा मार्गदर्शन केंद्र यांचा समावेश असावा. शासनाच्या अनुदान मर्यादेत काम पूर्ण करावे व उर्वरित निधी तालुका क्रीडा संकुल समितीने स्वबळावर उभारावा, असे निर्देश त्यांनी दिले.
कोपरगावसाठी नव्या क्रीडा संकुलाचा प्रस्ताव तयार करण्यास सांगण्यात आले असून, शहराच्या मध्यवर्ती भागात अद्ययावत सुविधांनी युक्त संकुल उभारण्यावर भर देण्यात आला आहे. कोपरगाव शहरातील शालेय विद्यार्थ्यांची संख्या १५ हजारांहून अधिक असल्याने हे संकुल नवोदित क्रीडापटूंना घडवण्यासाठी उपयुक्त ठरणार असल्याचेही मंत्री भरणे यांनी नमूद केले.
या निर्णयामुळे ग्रामीण व शहरी भागातील युवकांना क्रीडा क्षेत्रात करिअर घडवण्यास हातभार लागणार असून, महाराष्ट्रातल्या क्रीडाक्षेत्राला नवी दिशा मिळेल, असा विश्वास यावेळी व्यक्त करण्यात आला.
