कोपरगाव : दिलीप गायकवाड
कोपरगाव नगरपरिषद हद्दीतील महात्मा गांधी चॅरिटेबल ट्रस्टच्या प्रदर्शन हॉल मैदानावर महाशिवरात्र निमित्त आयोजित करण्यात आलेला ‘एक्स्पो व सांस्कृतिक महोत्सव २०२६’ उत्साहात सुरू झाला आहे. दि. १२ ते १५ फेब्रुवारीदरम्यान चार दिवस चालणाऱ्या या महोत्सवाला नागरिकांचा उत्स्फूर्त प्रतिसाद मिळत आहे.
या महोत्सवाचे आयोजन लायन्स क्लब, लायनेस क्लब, लिओ क्लब ऑफ कोपरगाव, क्रेडाई कोपरगाव तसेच कर्मवीर शंकररावजी काळे साहेब उद्योग समूह यांच्या संयुक्त विद्यमाने करण्यात आले आहे. विविध उद्योग, व्यवसाय, शैक्षणिक संस्था, स्वयंरोजगार उपक्रम तसेच स्थानिक उत्पादनांचे आकर्षक स्टॉल्स येथे उभारण्यात आले असून नागरिकांना एकाच छताखाली विविध क्षेत्रांची माहिती मिळत आहे.
महोत्सवात दररोज सांस्कृतिक कार्यक्रम, संगीत मैफिली, लहान मुलांसाठी स्पर्धा आणि विविध उपक्रमांचे आयोजन करण्यात आले आहे. त्यामुळे शहरातील वातावरण उत्साहपूर्ण झाले आहे.
दि. १६ फेब्रुवारी रोजी एक्स्पोची सांगता व पारितोषिक वितरण समारंभ आयोजित करण्यात आला असून या कार्यक्रमासाठी प्रसिद्ध अभिनेत्री स्पृहा जोशी यांची विशेष उपस्थिती लाभणार आहे. यावेळी विविध स्पर्धांतील विजेत्यांना पारितोषिकांचे वितरण करण्यात येणार आहे.
या महोत्सवाचा लाभ घेण्यासाठी नागरिकांनी मोठ्या संख्येने उपस्थित राहावे, असे आवाहन आयोजकांकडून करण्यात आले आहे.
