नगरपरिषदेकडून तातडीने उपाययोजनांची मागणी
कोपरगाव, दि. २१ : दिलीप गायकवाड
कोपरगाव नगरपरिषदेच्या हद्दीतील गांधीनगर भागात असलेले इनडोअर गेम हॉलचे भव्य मैदान सध्या अतिक्रमण, माती साचवणूक आणि अस्वच्छतेमुळे चर्चेत आले आहे. या मैदानात ज्येष्ठ नागरिक दवाखाना, राजा शिवछत्रपती व्यायामशाळा, जिम तसेच शासनमान्य राष्ट्रभाषा सेवा मंच संचलित स्व. र. म. पारिख हिंदी व मराठी सार्वजनिक ग्रंथालय अशा महत्त्वाच्या वास्तू आहेत.
लहान मुलांसाठी या मैदानात खासदार भाऊसाहेब वाकचौरे यांच्या प्रयत्नातून क्रीडा साहित्य उपलब्ध करून देण्यात आले आहे. मात्र अलीकडील काळात या मैदानात काही ठिकाणी अतिक्रमण दिसून येत असून, मोठ्या प्रमाणात मातीचे ढीग टाकून माती साचवण्यात आल्याचे निदर्शनास आले आहे. याबाबत चौकशी केली असता संबंधितांनी याची माहिती नसल्याचे सांगितले.
या संदर्भात प्रमोद येवले यांच्याशी चर्चा केली असता, यांनी नगरपरिषदेने या मैदानाकडे गांभीर्याने लक्ष देण्याची गरज व्यक्त केली. मैदानात झाडे-झुडपे लावून सौंदर्यीकरण करावे, सर्व सोयीसुविधायुक्त मैदान विकसित करावे, बंद अवस्थेतील जलतरण तलाव (स्विमिंग पूल) पुन्हा सुरू करण्याबाबत विचार करावा, तसेच ज्येष्ठ नागरिकांसाठी बसणे-उठणे आदी सुविधा उपलब्ध करून द्याव्यात, अशी मागणी त्यांनी केली.
सध्या परिसरात मोठ्या प्रमाणात कचरा व घाण साचली असून, स्वच्छता राखण्यासाठी तातडीने उपाययोजना करून कचऱ्याची योग्य विल्हेवाट लावावी, अशीही मागणी नागरिकांकडून होत आहे
