मुख्यमंत्री फडणवीस यांच्या उपस्थितीत दोन हजार कोटींचा करार….
मुंबई, दि.२ ( प्रतिनिधी )
पनवेल येथे जागतिक पातळीवर सर्वोत्तम ठरेल असा एए स्टुडिओ उभारण्यात येणार असून, यासाठी महाराष्ट्र शासन आणि ‘गोदरेज फंड मॅनेजमेंट अँड इन्व्हेस्टमेंट ॲडव्हायझर्स प्रायव्हेट लिमिटेड’ यांच्यात दोन हजार कोटी रुपयांचा करार झाला आहे. हा करार मुख्यमंत्री देवेंद्र फडणवीस यांच्या उपस्थितीत पार पडला.
या वेळी मुख्यमंत्री फडणवीस म्हणाले, “गोदरेज ही गुणवत्ता व विश्वासार्हतेसाठी ओळखली जाणारी कंपनी आहे. त्यामुळे हा स्टुडिओ जागतिक स्तरावर सर्वोत्तम ठरेल, यासाठी प्रयत्न व्हावेत.”
या करारावर महाराष्ट्र शासनाच्या वतीने उद्योग विभागाचे सचिव डॉ. पी. अन्बलगन आणि गोदरेज कंपनीच्या वतीने महाव्यवस्थापक हरसिमरण सिंग यांनी स्वाक्षरी केली. यावेळी राज्याचे मुख्य सचिव सुजाता सौनिक, सिडकोचे अध्यक्ष विजय सिंघल, एमआयडीसीचे मुख्य कार्यकारी अधिकारी पी. वेलारासू, उद्योग विकास आयुक्त दीपेंद्र सिंह कुशवाह आदी मान्यवर उपस्थित होते.
कराराच्या पहिल्या टप्प्यात ५०० कोटींची गुंतवणूक होणार असून, याद्वारे सुमारे ६०० रोजगारांच्या संधी निर्माण होणार आहेत. हा टप्पा २०२७ पर्यंत सुरू होईल. दुसऱ्या टप्प्यात १५०० कोटींची गुंतवणूक आणि १९०० रोजगार निर्मितीची अपेक्षा असून हा टप्पा २०३० पर्यंत सुरू होईल. एकूण २००० कोटींच्या गुंतवणुकीद्वारे २५०० रोजगार उपलब्ध होणार आहेत.
या प्रकल्पामुळे महाराष्ट्रातील फिल्म आणि मीडिया उद्योगाला नवे बळ मिळणार असून, पनवेल हे भविष्यातील फिल्म हब म्हणून उदयास येईल, असा विश्वास व्यक्त केला जात आहे.
