दावरवाडी, दि. १७ (अभिजीत सोनवणे )
नागपूर येथे सुरू असलेल्या हिवाळी अधिवेशनाच्या पार्श्वभूमीवर महाराष्ट्र राज्य पोलिस पाटील संघटनेने विविध मागण्यांसाठी दि. १० डिसेंबर रोजी मोर्चा काढला. पोलिस पाटील अधिनियम १९६७ मध्ये दुरुस्ती करून त्याची काटेकोर अंमलबजावणी करावी, पोलिस पाटलांचे नुतनीकरण कायमस्वरूपी बंद करावे, सेवानिवृत्तीनंतर एकरकमी २० लाख रुपये देण्यात यावेत तसेच यासाठी स्वतंत्र कल्याणकारी निधी स्थापन करावा, अशा प्रमुख मागण्या यावेळी मांडण्यात आल्या.
या मोर्चाला पैठणचे आमदार विलास भुमरे यांनी तातडीने भेट देत पोलिस पाटलांच्या समस्या व मागण्या जाणून घेतल्या. पोलिस पाटलांच्या सकारात्मक मागण्या विधीमंडळात सादर करून त्या पूर्ण करण्यासाठी प्रयत्न करणार असल्याचे आश्वासन आ. भुमरे यांनी दिले.
यावेळी पोलिस पाटील संघटनेचे मराठवाडा अध्यक्ष अशोक चाबुकस्वार, जिल्हाध्यक्ष अशोक ठोंबरे यांच्यासह मानिक साळवे, एकनाथ काशिद, दत्तात्रय राऊत, अशोक घाडगे, जनार्दन शिंदे, कल्याणराव आगळे, रामेश्वर सोनवणे, विश्वनाथ मगरे, विठ्ठल झिणे आदी पदाधिकारी व शेकडो पोलिस पाटील मोठ्या संख्येने उपस्थित होते.
छाया : नागपूर येथे आ. विलास भुमरे यांनी महाराष्ट्र राज्य पोलिस पाटील संघटनेच्या मोर्चास भेट देऊन मागण्या जाणून घेत पाठिंबा दर्शविला.
(छाया : अभिजीत सोनवणे )
