कणकवली, दि.४.( उमेश शेट्ये)
कासार्डे येथील मातीतून घडलेले ज्यूदो प्रशिक्षक श्री. अभिजित मधुकर शेट्ये यांना त्यांच्या उल्लेखनीय क्रीडा योगदानाबद्दल “उत्कृष्ट ज्यूदो प्रशिक्षक पुरस्कार २०२६” प्रदान करून सन्मानित करण्यात आले. जे. वाय. एज्युकेशन सोसायटी संचलित ए.पी.एस. ज्यूदो क्लब, आंबोली व आंबोली पब्लिक स्कूल, जिल्हा सिंधुदुर्ग यांच्या वतीने हा सन्मान प्रदान करण्यात आला.
सिंधुदुर्ग जिल्हा ज्यूदो असोसिएशनचे खजिनदार म्हणून कार्यरत असलेले शेट्ये सर हे केवळ प्रशिक्षक न राहता शेकडो खेळाडूंच्या जीवनाला योग्य दिशा देणारे खरे मार्गदर्शक ठरले आहेत. त्यांच्या मार्गदर्शनाखाली अनेक गुणवंत ज्यूदोपट्टूंनी राज्य व राष्ट्रीय स्तरावर उल्लेखनीय यश संपादन करत सिंधुदुर्ग जिल्ह्याचे नाव उज्वल केले आहे.
शिस्त, संयम, मेहनत आणि आत्मविश्वास या मूल्यांवर भर देत शेट्ये सरांनी ज्यूदो या क्रीडा प्रकाराची प्रतिष्ठा उंचावली आहे. त्यांच्या सातत्यपूर्ण योगदानाची दखल घेतच त्यांना हा मानाचा पुरस्कार प्रदान करण्यात आला असून क्रीडा क्षेत्रातून त्यांच्या कार्याचे सर्वत्र कौतुक होत आहे.
“खेळाडू घडवणे म्हणजे भविष्य घडवणे” हे ब्रीद जपत कार्यरत असलेल्या अभिजित शेट्ये यांना उपस्थित मान्यवरांकडून पुढील वाटचालीसाठी हार्दिक शुभेच्छा देण्यात आल्या. त्यांनी भविष्यातही असेच कार्य करत ज्यूदो क्रीडा प्रकाराची शान वाढवावी, अशी अपेक्षा यावेळी व्यक्त करण्यात आली.
