१३२३ सदनिका आणि १८ भूखंडांसाठी ३१ ऑगस्टपर्यंत ऑनलाईन अर्ज स्वीकार…
छत्रपती संभाजीनगर, दि.५ : अजय मगरे
म्हाडाच्या छत्रपती संभाजीनगर मंडळातर्फे विविध गृहनिर्माण योजनेंतर्गत १३२३ निवासी सदनिका आणि १८ भूखंडांची संगणकीय सोडत लवकरच जाहीर होणार आहे. या सोडतीसाठी अर्ज करण्याची मुदत आता ३१ ऑगस्ट २०२५ पर्यंत वाढवण्यात आली आहे, अशी माहिती मंडळाचे मुख्य अधिकारी दत्तात्रय नवले यांनी दिली.
या सोडतीत प्रधानमंत्री आवास योजना (शहरी) अंतर्गत १,१४८ सदनिका, म्हाडा गृहनिर्माण योजनेतील १५४ सदनिका, तसेच २०% सर्वसमावेशक योजनेतील २१ सदनिका आणि १८ भूखंडांचा समावेश आहे.
ऑनलाईन अर्ज आणि अनामत रक्कम भरण्याची अंतिम मुदत ३१ ऑगस्टच्या रात्री ११.५९ वाजेपर्यंत असून, RTGS/NEFT च्या माध्यमातून १ सप्टेंबरपर्यंत भरणा करता येणार आहे. पात्र अर्जांची प्रारूप यादी ८ सप्टेंबरला, तर अंतिम यादी १६ सप्टेंबरला जाहीर होणार आहे. संगणकीय सोडत २६ सप्टेंबर रोजी जिल्हाधिकारी कार्यालयातील नियोजन सभागृहात होणार आहे.
दरम्यान, काही अटी-शर्तींमध्ये बदल करण्यात आले असून, आता अर्जदारांना आर्थिक वर्ष २०२४-२५ मधील उत्पन्नाचा पुरावा सादर करावा लागेल. तसेच प्रधानमंत्री आवास योजनेच्या अर्जासाठी आधी नोंदणी प्रमाणपत्र गरजेचे होते, मात्र आता ते फक्त यशस्वी अर्जदारांनी पुढील टप्प्यात सादर करणे आवश्यक राहील.
