ठाणे, दि.११ : अजय मगरे :
अल्पवयीन मुलीच्या खून प्रकरणातील आरोपीला वागळे इस्टेट गुन्हे शाखा युनिट-५ च्या पथकाने शिताफीने सापळा रचत अटक केली आहे. समाधान अर्जुन सूर्यवंशी (वय ४०, रा. सुखशांती चाळ, लोकमान्यनगर, ठाणे) असे अटक करण्यात आलेल्या आरोपीचे नाव आहे.
कासारवडवली पोलीस ठाण्यात ५ जुलै रोजी कलम १०३, २३८ भारतीय न्याय संहिता २०२३ अन्वये गुन्हा नोंदविण्यात आला होता. तपासादरम्यान अल्पवयीन मुलगी हरवल्याचा गुन्हा कळवा पोलीस ठाण्यातही नोंद झाला होता. या गुन्ह्याचा समांतर तपास वागळे गुन्हे शाखा युनिट-५ मार्फत सुरू होता.
वरिष्ठ पोलीस निरीक्षक सलील भोसले यांच्या मार्गदर्शनाखाली सपोनिरी शरद पाटील यांच्या नेतृत्वाखालील पथकाने सीसीटीव्ही फुटेजच्या आधारे तपासाची चक्रे फिरवली. त्यात मुलगी घरातून निघून ठाणे रेल्वे स्थानक रिक्षा स्टँडपर्यंत गेल्याचे दिसले. अधिक चौकशीअंती ती एका रिक्षातून गेल्याचे उघड झाले. तांत्रिक तपासातून रिक्षाचालकाचाच गुन्ह्यात सहभाग असल्याचे स्पष्ट झाले.
पथकाने समाधान सूर्यवंशी याला १० जुलै रोजी ताब्यात घेतले असून त्याच्याकडून अधिक तपास सुरू आहे. पुढील तपास कासारवडवली पोलीस ठाणे करत आहेत.
सदर कारवाई अपर पोलीस आयुक्त डॉ. पंजाबराव उगले, पोलीस उपायुक्त (गुन्हे) अमरसिंह जाधव, सहायक पोलीस आयुक्त (गुन्हे) शेखर बागडे यांच्या मार्गदर्शनाखाली करण्यात आली. तपास पथकात निरीक्षक नितीन पाटील, सपोनिरी भुषण शिंदे, पल्लवी ढगेपाटील, तुषार माने यांच्यासह राजेंद्र चौधरी, यश यादव, तेजस ठाणेकर, बंडगर यांचा समावेश होता.
