भिवंडी | प्रतिनिधी
भिवंडी-निजामपूर महानगरपालिकेच्या महापौर निवडणुकीत आज मोठा राजकीय उलटफेर पाहायला मिळाला. भाजपचे ज्येष्ठ नगरसेवक नारायण चौधरी यांनी पक्षाविरोधात बंड करत काँग्रेसप्रणीत सेक्युलर फ्रंट’च्या पाठिंब्यावर महापौरपदावर विजय मिळवला. या निकालामुळे महापालिकेतील सत्तासमीकरण बदलण्याची शक्यता निर्माण झाली असून भाजपला मोठा राजकीय धक्का बसला आहे.
भाजपच्या निर्णयामुळे बंड
भाजपने 18 फेब्रुवारी रोजी ऐनवेळी नारायण चौधरी यांना डावलून स्नेहा पाटील यांना अधिकृत उमेदवारी दिली होती. या निर्णयामुळे नाराज झालेल्या चौधरी यांनी 7 ते 8 नगरसेवकांसह स्वतंत्र गट स्थापन करत काँग्रेस, राष्ट्रवादी (राशप) आणि इतरांसोबत हातमिळवणी केली.या आघाडीमधून ‘सेक्युलर फ्रंट’ची स्थापना करण्यात आली आणि निवडणुकीत त्यांनी निर्णायक भूमिका बजावली.
निकालाचा तपशील
• नारायण चौधरी (बंडखोर) — 48 मते
• विलास पाटील — 25 मते
• स्नेहा पाटील (भाजप) — 16 मते
चौधरी यांनी स्पष्ट आघाडी घेत विजय मिळवत महापौरपद पटकावले. अधिकृत उमेदवाराला अपेक्षित पाठिंबा न मिळाल्यामुळे भाजपमधील गटबाजी पुन्हा उघड झाली आहे.
सेक्युलर फ्रंटचे वर्चस्व
काँग्रेस, राष्ट्रवादी (राशप) आणि भाजपच्या बंडखोर नगरसेवकांनी एकत्र येत ‘सेक्युलर फ्रंट’च्या माध्यमातून सत्ता स्थापन करण्याची भूमिका घेतली आहे. त्यांच्या मतांमुळेच चौधरी यांचा विजय शक्य झाल्याचे राजकीय वर्तुळात बोलले जात आहे.
