“राहुल गांधींसोबतचा व्हिडिओ व्हायरल; सायन-कोळीवाड्याचे गणेश कुमार यादव पुन्हा फोकसमध्ये”
मुंबई -मंगेश म्हात्रे
मुंबई युवक काँग्रेसमधुन राजकीय प्रवास सुरू करणारे काँग्रेस पदाधिकारी गणेश कुमार यादव सध्या पुन्हा एकदा चर्चेत आले आहेत. तामिळनाडूमधील जोसेफ विजय यांच्या शपथविधीच्या कार्यक्रमात काँग्रेस नेते राहुल गांधी यांच्यासोबत दिसल्यानंतर सोशल मीडियावर त्यांच्या नावाची मोठी चर्चा सुरू झाली आहे.
सायन-कोळीवाड्यातील युवक नेतृत्व म्हणून ओळख निर्माण करणारे गणेश कुमार यादव यांनी मुंबई काँग्रेस युवक अध्यक्षपदाची जबाबदारी सांभाळली होती. सध्या ते अखिल भारतीय काँग्रेस समिती (AICC ) सचिव आणि मुंबई काँग्रेसचे वरिष्ठ उपाध्यक्ष म्हणून कार्यरत आहेत. आणि मुंबईतील दक्षिण भारतीय समाजात काँग्रेसचा प्रभावी चेहरा म्हणूनही त्यांची ओळख आहे.
गणेश कुमार यादव यांनी २०१९ आणि २०२४ या दोन्ही विधानसभा निवडणुका सायन-कोळीवाडा मतदारसंघातून लढवल्या. विशेषतः २०२४ च्या निवडणुकीत महाविकास आघाडीचे काँग्रेस उमेदवार म्हणून त्यांनी जोरदार लढत दिली. तब्बल ६५ हजार ५३४ मते मिळवत त्यांनी दोन टर्म आमदार राहिलेल्या तामिळ सेल्वन यांना कडवी टक्कर दिली. अखेर अवघ्या ७ हजार ८९५ मतांनी त्यांचा पराभव झाला, मात्र या लढतीमुळे गणेश यादव यांचे राजकीय वजन मोठ्या प्रमाणात वाढल्याचे मानले जाते.
मुंबईतील स्थानिक राजकारणापासून थेट दक्षिण भारतातील काँग्रेसच्या कार्यक्रमांपर्यंत सक्रिय उपस्थिती लावत गणेश कुमार यादव आता पक्षातील महत्त्वाचे युवा नेतृत्व म्हणून पुढे येताना दिसत आहेत. राहुल गांधींसोबतचा त्यांचा व्हिडिओ व्हायरल झाल्यानंतर “सायन-कोळीवाड्याचा नेता आता साऊथच्या राजकारणातही चर्चेत” अशी चर्चा राजकीय वर्तुळात रंगली आहे.
