अकोला जिल्ह्यात खळबळ उडवणारी धक्कादायक घटना समोर आली आहे. अकोला पश्चिमचे काँग्रेस आमदार साजिद खान पठाण यांना कुख्यात बिश्नोई गँगशी संबंधित गुन्हेगार शुभम लोणकर याने तब्बल 10 कोटी रुपयांच्या खंडणीची धमकी दिल्याची माहिती उघड झाली आहे. अकोल्यात सलग दुसऱ्या आमदाराला धमकी मिळाल्याने पोलिस यंत्रणा सतर्क झाली असून राजकीय वर्तुळातही चिंतेचे वातावरण आहे.
“दोन दिवसात 10 कोटी दे… नाहीतर गेम करू”
मिळालेल्या माहितीनुसार, 17 फेब्रुवारी रोजी दुपारी 3 वाजण्याच्या सुमारास आमदार पठाण यांना धमकीचा कॉल आला. कॉलमध्ये थेट इशारा देत “दोन दिवसांत 10 कोटी रुपये दे, नाहीतर तुझा गेम करू” अशी धमकी देण्यात आली. हा कॉल कॅलिफोर्नियावरून आल्याचा प्राथमिक तपासात अंदाज व्यक्त केला जात आहे.
वाढवली सुरक्षा, चार शस्त्रधारी पोलीस तैनात
धमकीनंतर परिस्थितीचे गांभीर्य लक्षात घेऊन आमदार पठाण यांच्या सुरक्षेत तातडीने वाढ करण्यात आली आहे. जिल्हा पोलीस अधीक्षक अर्चित चांडक यांच्याकडे अधिकृत तक्रार करण्यात आली असून या प्रकरणात पोलिसांकडून अत्यंत गोपनीयता राखली जात आहे.
अकोल्यात सलग दुसरी धमकी, पोलिस दलात खळबळ
काही दिवसांपूर्वीच अकोटचे भाजप आमदार प्रकाश भारसाकळे यांनाही धमकी मिळाल्याची घटना ताजी असतानाच आता पठाण यांना धमकी आल्याने बिश्नोई गँगची अकोल्यातील सक्रियता वाढल्याची शक्यता आहेस्थानिक पोलिसांसाठी मोठं आव्हानाची परिस्थिती निर्माण झाली आहे.
