कारवाईत 7 आरोपी अटकेत, 343 बोगस रेशनकार्ड जप्त
मुंबई | प्रतिनिधी
महात्मा ज्योतिबा फुले जन आरोग्य योजना, प्रधानमंत्री जन आरोग्य योजना तसेच इतर शासकीय योजनांचा लाभ घेण्यासाठी बनावट रेशन कार्ड तयार करणाऱ्या टोळीवर दिंडोशी पोलिसांनी मोठी कारवाई करत सात जणांना अटक केली आहे. या कारवाईत पोलिसांनी 343 बनावट शिधापत्रिका, तसेच बनावट कागदपत्रे तयार करण्यासाठी वापरले जाणारे साहित्य जप्त केले आहे.
पोलिसांकडून मिळालेल्या माहितीनुसार, ही टोळी गेल्या अनेक दिवसांपासून बनावट रेशन कार्ड तयार करून शासकीय योजनांचा लाभ घेण्यासाठी गैरप्रकार करत होती. गुप्त माहितीच्या आधारे दिंडोशी पोलिसांनी छापा टाकत टोळीचा पर्दाफाश केला. कारवाईदरम्यान पोलिसांनी आरोपींकडून ९ लॅपटॉप, २ प्रिंटर, मोबाईल फोन आणि इतर कागदपत्रे जप्त केली आहेत. या प्रकरणी गुन्हा क्र. 91/2026 दाखल करण्यात आला असून तपास सुरू आहे.
पोलिसांच्या प्राथमिक तपासात या टोळीमध्ये रेशनिंग कार्यालयाशी संबंधित कर्मचाऱ्यांचाही सहभाग असल्याचे समोर आले असून संबंधितालाही अटक करण्यात आली आहे. आरोपी बोगस रेशनकार्डचं आधारे बांगलादेशी नागरिकांना ओळखपत्र मिळवून देणे तसेच महात्मा ज्योतिबा फुले जन आरोग्य योजना आणि प्रधानमंत्री जन आरोग्य योजना यांचा लाभ मिळवून देण्याच्या नावाखाली फसवणूक करत असल्याचे उघड झाले आहे.
अटक करण्यात आलेल्या आरोपींची नावे सुजल दयाल (२९), राकेश सिंग (४३), दिनेश कुमार केसारवाणी (४०), एडवर्ड उर्फ सोनू डिसोजा (४३), मनी शंकर शर्मा (३९), बिपिन कुमार पांडे (४२) आणि वीरू गुप्ता (३१) अशी असून ते मूळ नेपाळचे रहिवासी असल्याची माहिती आहे.
या टोळीमध्ये आणखी कोणाचा सहभाग आहे का तसेच मुंबईत किती लोकांना बनावट रेशन कार्ड देण्यात आले याचा सखोल तपास दिंडोशी पोलिसांकडून सुरू आहे.
