कोपरगांव : दिलीप गायकवाड
कोपरगाव तालुक्यातील जेऊरकुंभारी, हरिसन ब्रॅच चार (तीन चारी) नगर–मनमाड, शिर्डी बायपास महामार्गालगत नागरे वस्ती येथील रेनबो इंटरनॅशनल स्कूलच्या वसतिगृह आवारातून दुचाकी चोरीची घटना घडली आहे. दि. ३ फेब्रुवारी रोजी पहाटे सुमारे ३ वाजण्याच्या सुमारास ही घटना उघडकीस आली.
शाळेचे कर्मचारी सुभाष शिवगीरी गोसावी (रा. संवत्सर) यांनी दोन महिन्यांपूर्वीच सुमारे ८१ हजार रुपये किमतीची हिरो कंपनीची डीएफ-डिलक्स (क्रमांक MH-17 DM 2523) ही नवी मोटारसायकल खरेदी केली होती. नेहमीप्रमाणे त्यांनी ती शाळेच्या वसतिगृह आवारात लावली होती. मात्र पहाटेच्या सुमारास अज्ञात चोरट्यांनी ती दुचाकी चोरून नेली.
या प्रकरणी सुभाष गोसावी यांनी कोपरगाव शहर पोलीस ठाण्यात तक्रार दाखल केली आहे. पोलिसांनी घटनास्थळी भेट देऊन पंचनामा केला असून पुढील तपास सुरू असल्याची माहिती गोसावी यांनी दिली. शाळा व वसतिगृह परिसरात सुरक्षा व्यवस्था असतानाही चोरीची घटना घडल्याने परिसरात चिंतेचे वातावरण पसरले आहे.
दरम्यान, जेऊरकुंभारी गावात यापूर्वीही अशा प्रकारच्या चोरीच्या घटना घडल्या असल्याची माहिती नागरिकांनी दिली. वारंवार होणाऱ्या चोऱ्यांमुळे ग्रामस्थांनी पोलीस प्रशासनाकडे कारवाईची मागणी केली आहे. चोरट्यांचा बंदोबस्त करून गावात सुरक्षिततेची भावना निर्माण करावी, अशी मागणी नागरिकांकडून होत आहे.
गावातील बहुतांश रस्त्यांवर वीज दिवे नसल्याने रात्रीच्या वेळी अंधाराचे साम्राज्य पसरलेले असते. हरिसन ब्रॅच चारी परिसर, इरिगेशन बंगला ते संजय नगर मार्ग, गिरमे वस्ती व चव्हाण वस्ती येथील रस्त्यांवरही प्रकाशयोजना नसल्याने चोरट्यांना संधी मिळत असल्याची चर्चा आहे. रात्री घरगुती वीजपुरवठाही खंडित होत असल्याने वाहनांची ओळख पटविणे कठीण जाते, असे ग्रामस्थांचे म्हणणे आहे.
दोन महिन्यांपूर्वी घेतलेली नवी मोटारसायकल चोरीला गेल्याने गोसावी हताश झाले असून पोलिस प्रशासनाकडून दुचाकी लवकरात लवकर शोधून काढली जाईल, अशी त्यांना अपेक्षा आहे.
