ठाणे : प्रतिनिधी
महिलांच्या सक्षमीकरणासाठी सरकार विविध योजना राबविते. मात्र ठाण्यातील वागळे इस्टेट पोलिस ठाण्यात एकही महिला अधिकारी नसल्याची बाब समोर आली आहे. त्यामुळे महिला तक्रारींच्या हाताळणीबाबत प्रश्न उपस्थित होत आहेत.
जागतिक महिला दिनाच्या पार्श्वभूमीवर सरकार, संघटनांकडून विविध कार्यक्रम घेण्यात येतात. मात्र याच दिवसाच्या पूर्वसंध्येला ठाणे शहरातील वागळे इस्टेट पोलीस ठाण्यात महिला अधिकारी नसल्याचे प्रकरण समोर आले आहे. या पोलीस ठाण्यात महिला पोलिस कर्मचारी कार्यरत आहेत. मात्र अधिकारी पदावर एकही महिला नाही. त्यामुळे महिलांशी संबंधित गंभीर तक्रारी किंवा चौकशीच्या वेळी महिला अधिकाऱ्यांचा अभाव जाणवत असल्याचे बोलले जात आहे.
महिलांवरील अत्याचार, छेडछाड, कौटुंबिक हिंसाचार किंवा इतर संवेदनशील तक्रारींसाठी महिला अधिकाऱ्यांची उपस्थिती महत्त्वाची मानली जाते. मात्र अशा परिस्थितीत तक्रार देण्यासाठी येणाऱ्या महिलांना अडचणींचा सामना करावा लागण्याची शक्यता व्यक्त केली जात आहे.
विशेष म्हणजे हे पोलिस ठाणे उपमुख्यमंत्री एकनाथ शिंदे यांच्या मतदारसंघात येते. राज्य सरकारकडून महिलांसाठी ‘लाडकी बहिण’ सारख्या योजना राबविल्या जात असताना पोलिस यंत्रणेतच महिला अधिकाऱ्यांची कमतरता असल्याचे चित्र समोर येत आहे.
दरम्यान, याबाबत वागळे इस्टेट पोलिस ठाण्याचे वरिष्ठ पोलिस निरीक्षक शिवाजी गवारे यांच्याशी संपर्क साधला असता त्यांनी सांगितले की, “आमच्या पोलिस ठाण्यात सध्या महिला अधिकारी नाहीत. मात्र महिला पोलिस कर्मचारी आहेत. एखाद्या प्रकरणात महिला अधिकाऱ्यांची गरज भासल्यास शेजारच्या पोलिस ठाण्यातील महिला अधिकाऱ्यांची मदत घेतली जाते.”
