शेतीतील संघर्षातून शिक्षणात यश,स्वातीचा १२वीत पहिला क्रमांक
कोपरगाव, दि.१० ( दिलीप गायकवाड )
नाशिक जिल्ह्यातील येवला तालुक्यातील धामोडे गावातील स्वाती आसाराम कांबळे हिने आपल्या कष्टाने आणि जिद्दीने वडिलांचे अपूर्ण स्वप्न साकार करत १२वी परीक्षेत नेत्रदीपक यश संपादन केलं आहे. सावरगाव येथील न्यू इंग्लिश स्कूल व एम. जी. पाटील उच्च माध्यमिक विद्यालयात शिक्षण घेतलेल्या स्वातीने नगरसुल केंद्राच्या कला शाखेत प्रथम क्रमांक, तर तालुक्यात तृतीय क्रमांक मिळवून सर्वांचे लक्ष वेधून घेतलं आहे.
स्वाती अकरावीत असताना तिच्या वडिलांचे निधन झाले. घरची परिस्थिती बेताची असतानाही स्वातीने आई व भावासोबत शेतात काम करत अभ्यासात सातत्य ठेवले. प्रतिकूल परिस्थितीवर मात करत, शेतीकामे सांभाळत १२वीत ८५.५०% गुण मिळवले.
स्वातीच्या यशाचा गौरव ग्रामस्थ आणि नातेवाईक यांनी शाल, श्रीफळ व पुष्पगुच्छ देऊन तिचा सत्कार केला.आणि त्यांच्यावतीने भावी वाटचालीसाठी शुभेच्छा देण्यात आल्या.
“शिकण्याची तळमळ, मेहनत आणि जिद्द असेल तर यश हमखास मिळतं” – हे स्वातीने आपल्या कर्तृत्वातून सिद्ध केलं आहे. तिच्या यशामुळे धामोडे गावाचा गौरव वाढला असून, ती अनेकांसाठी प्रेरणास्थान ठरली आहे. अशी माहिती सामाजिक नेते विजय विघे यांनी बहुजन शक्ती ऑनलाईन न्यूज 24 ला दिली आहे.स्वातीला तिच्या पुढील शिक्षणासाठी बहुजन शक्ती परिवारातर्फे हार्दिक शुभेच्छा!
