सायन प्रतीक्षा नगरमध्ये तोडक कारवाईनंतर म्हाडाचा मोठा निर्णय; ७ कुटुंबांना तात्काळ घराच्या चाव्या!
मुंबई -मंगेश म्हात्रे
सायन प्रतीक्षा नगर येथील म्हाडा संक्रमण शिबिरातील डी लाईन बैठ्या चाळीतील रहिवाशांवर मंगळवारी ७ एप्रिल २०२६ रोजी कोणतेही स्थलांतर न देता थेट तोडक कारवाई करण्यात आली होती. या कारवाईमुळे नागरिकांमध्ये प्रचंड संताप उसळला होता.
या पार्श्वभूमीवर बुधवारी ८ एप्रिल २०२६ प्रतीक्षा नगर मधील सर्वपक्षीय लोकप्रतिनिधींनी म्हाडा उपाध्यक्ष संजीव जयस्वाल यांच्या दालनात संबंधित अधिकाऱ्यांसोबत तातडीची बैठक घेतली. बैठकीत रहिवाशांच्या प्रश्नांवर सविस्तर चर्चा करण्यात आली.
सदर बैठकीत महत्वाचा निर्णय घेत म्हाडा उपाध्यक्षांनी तात्काळ दिलासा देत आदेश दिले की, तोडलेल्या डी लाईनमधील सर्व पात्र रहिवाशांना लगेच घरे देण्यात यावीत.
त्यानुसार, घर तोडलेल्या ७ रहिवासी कुटुंबांना उद्या घराच्या चाव्या देऊन सायन प्रतीक्षा नगर येथील संक्रमण शिबिरातील इमारतीमध्ये स्थलांतर करण्यात येणार आहे.उर्वरित ३ रहिवाशांच्या कागदपत्रांची तपासणी करून पुढील निर्णय घेतला जाणार असल्याची माहिती देण्यात आली.
या बैठकीला म्हाडा सह मुख्याधिकारी उमेश वाघ, उपमुख्य अधिकारी मोहन बोबडे, मिळकत व्यवस्थापक संजय शिरसाट यांच्यासह विविध पक्षांचे आमदार, नगरसेवक व स्थानिक पदाधिकारी मोठ्या संख्येने उपस्थित होते.
