गॅस तुटवड्याचा फायदा घेत काळाबाजार; प्रशासनाकडून कारवाईची नागरिकांची मागणी
कोपरगाव, दि.९.( दिलीप गायकवाड )
कोपरगाव शहरात रॉकेल माफियांनी अक्षरशः हैदोस घातल्याचे चित्र समोर आले आहे. शहरातील काही ठिकाणी रॉकेल (केरोसिन) तब्बल १३० ते १४० रुपये प्रति लिटर दराने विकले जात असल्याने सर्वसामान्य नागरिक, मजूर आणि छोटे हॉटेल व्यावसायिक हैराण झाले असल्याचे समजून येते.
घरगुती व व्यावसायिक गॅसचा तुटवडा निर्माण झाल्यामुळे अनेक छोटे हॉटेल व्यावसायिकांनी गॅसऐवजी स्टोव्हचा वापर सुरू केला आहे. त्यामुळे रॉकेलची मागणी वाढली असून या परिस्थितीचा फायदा घेत रॉकेल माफियांनी काळाबाजार सुरू केल्याचा आरोप नागरिकांकडून केला जात आहे.
मात्र सध्या शहरातील काही दुकानांमध्ये रॉकेल १३० ते १४० रुपये प्रति लिटर दराने विकले जात असल्याची कोपरगावात चर्चा आहे.
रॉकेलच्या वाढत्या दरामुळे अनेक हॉटेल व्यावसायिकांनी रॉकेलऐवजी डिझेलचा वापर सुरू केल्याचे सांगितले जात आहे. तर दुसरीकडे मजूर, कामगार आणि गरीब कुटुंबे अजूनही स्वयंपाकासाठी रॉकेलवर अवलंबून असल्याने त्यांना आर्थिक फटका बसत आहे.
अमेरिका – इराण युद्धस्थितीचे कारण पुढे करून शहरात रॉकेल माफियांच्या माध्यमातून साठेबाजी व चढ्या भावाने विक्री होत असल्याचा आरोप नागरिकांनी केला आहे. त्यामुळे प्रशासनाने तातडीने सखोल चौकशी करून रॉकेल माफियांवर कडक कारवाई करावी आणि रॉकेलचे दर आटोक्यात आणावेत, अशी जोरदार मागणी कोपरगावकरांकडून करण्यात येत आहे.
