कोपरगाव तहसीलसमोर महसूल कर्मचारी व अधिकाऱ्यांचे …
बेमुदत काम बंद आंदोलन तिसऱ्या दिवशीही सुरू…
कोपरगाव , दि. १२ मार्च ( दिलीप गायकवाड )
धारणगाव तलाठी व मंडळ अधिकारी तसेच कोपरगाव तहसील महसूल विभागातील दोन कर्मचाऱ्यांवर लाचलुचपत प्रतिबंधक विभागाने केलेल्या कार्यवाहीच्या निषेधार्थ महाराष्ट्र राज्य तलाठी संघटना, महाराष्ट्र राज्य महसूल संघटना आणि महाराष्ट्र राज्य कोतवाल संघटना तालुका कोपरगावच्या वतीने तहसील कार्यालया समोरबेमुदत काम बंद आंदोलन सुरू आहे. आज आंदोलनाचा तिसरा दिवस असून, संबंधित अधिकाऱ्यांवरील गुन्हे रद्द करण्याची मागणी करण्यात येत आहे.
आंदोलनकर्त्यांच्या म्हणण्यानुसार, लाचलुचपत प्रतिबंधक विभागाने कोणत्याही कर्मचाऱ्यांना लाच घेताना रंगेहाथ पकडले नाही, तरीही ही कार्यवाही करण्यात आली आहे, जी अन्यायकारक आहे. त्यामुळे महसूल विभागाच्या कर्मचाऱ्यांत तीव्र नाराजी आहे.महाराष्ट्र राज्य तलाठी, कोपरगाव तालुकाध्यक्ष आश्विनीताई निर्मल, धनेश गर्कळ, गणेश वाघ, कोल्हाळ, दिलीप घोरपडे, आदी सह सर्वंच महसूल अधिकारी – कर्मचारी सहभागी झाले आहेत.
या आंदोलनामुळे नागरिकांना मोठ्या अडचणींना सामोरे जावे लागत आहे. विविध प्रमाणपत्रे, जमीन दस्तऐवज आणि इतर महत्त्वाच्या कामांसाठी तहसील कार्यालयात आलेल्या नागरिकांची मोठी गैरसोय होत असल्याचे दिसून येते.
