मुंबई, दि. ३० मे २०२५ : छत्रपती संभाजीनगर येथील महाराष्ट्र गृहनिर्माण व क्षेत्रविकास प्राधिकरणाच्या (म्हाडा) मंडळामार्फत ५३ अनिवासी भूखंडांचा ई-लिलाव जाहीर करण्यात आला असून, त्यासाठी ऑनलाईन नोंदणी व अर्ज प्रक्रिया २ जून २०२५ पासून सुरू होणार आहे. मंडळाचे मुख्य अधिकारी शिवकुमार आवळकंठे यांनी ही माहिती दिली.
ई-लिलाव प्रक्रिया ७ जुलै २०२५ रोजी सकाळी ११ ते सायंकाळी ५ वाजेपर्यंत
www.eauction.mhada.gov.in या संकेतस्थळावर पार पडणार आहे. लिलावाचा एकत्रित निकाल ८ जुलै २०२५ रोजी सकाळी ११ वाजता म्हाडाच्या अधिकृत संकेतस्थळांवर (https://mhada.gov.in व www.eauction.mhada.gov.in) जाहीर केला जाईल.
अर्जदारांना ई-लिलावात सहभागी होण्यासाठी २ जून ते १ जुलै दरम्यान नोंदणी, ऑनलाईन अर्ज, आवश्यक कागदपत्रांची अपलोडिंग व अनामत रकमेचे भरणे करता येणार आहे. अनामत रकमेचा भरणा आरटीजीएस व एनईएफटीद्वारे २ जुलै २०२५ पर्यंत करता येईल.
ई-लिलावाची सविस्तर माहिती, पात्रता निकष, भूखंड तपशील, अटी व शर्ती, अर्ज प्रक्रिया व माहिती पुस्तिका www.eauction.mhada.gov.in व mhada.gov.in या संकेतस्थळांवर उपलब्ध आहे. अर्ज सादर करण्यापूर्वी सर्व माहिती काळजीपूर्वक वाचण्याचे आवाहन मंडळाने केले आहे. कोणत्याही मुद्रणदोषाचा लाभ अर्जदाराला मिळणार नाही, असेही मंडळाकडून स्पष्ट करण्यात आले आहे.
