केळुसकर महायुती धर्म पाळणार की वेगळी वाट धरणार?
मुंबई, दि.१९ : मंगेश म्हात्रे
प्रतीक्षा नगर परिसरातील माजी नगरसेवक रामदास कांबळे यांच्या शिंदे गट प्रवेशाने वार्ड क्रमांक 173 मध्ये राजकीय पटलावर नवे समीकरण निर्माण झाले आहे. महायुतीतील लोकसभा आणि विधानसभेच्या वाटपाच्या फॉर्मुल्यानुसार या वार्डची जागा शिवसेना (शिंदे गट) ला जाण्याची शक्यता व्यक्त केली जात आहे. त्यामुळे भाजप मंडळ अध्यक्ष दत्ता केळुसकर आणि 2017 चे भाजप उमेदवार विजय पगारे यांच्यासमोर कठीण प्रश्न उभा ठाकला आहे—“महायुती धर्म पाळावा की स्वतंत्र मार्ग स्वीकारावा?”
प्रतीक्षा नगर हा मध्यमवर्गीय व बहुसंख्य मराठी मतदारसंघ असून, येथे शिवसेनेचा वर्चस्वाचा इतिहास 1992 पासून कायम राहिला आहे. शाखाप्रमुख प्रकाश वाघधरे यांच्या निधनानंतर शिवसेनेला अनेक धक्के बसले. सुनील शेट्ये, दत्ता केळुसकर यांच्यासह काही नेत्यांनी पक्षा बाहेर पडून
इतर राजकीय पर्याय स्वीकारले. 2023 मध्ये माजी नगरसेवक मंगेश सातमकर यांनी शिंदे गटात प्रवेश केला, तर 2024 च्या लोकसभा निवडणुकीत अनिल देसाई खासदार निवडून आल्याने उबाठा गटाला दिलासा मिळाला.
या पार्श्वभूमीवर रामदास कांबळे यांच्या प्रवेशाने शिवसेना (शिंदे गट) ने प्रतीक्षा नगरमध्ये जोरदार मोहरा उभा केला आहे. शांत व संयमी वृत्तीमुळे स्थानिक सहानुभूती असलेले कांबळे शिंदे गटात सामील झाल्यानंतर, ही सहानुभूती भाजपकडे झुकत असल्याचे चित्र दिसते. त्यामुळे भाजप नेते दत्ता केळुसकर यांच्या हालचालींवर सर्वांचे लक्ष लागले आहे.
दरम्यान, 2018 च्या पोटनिवडणुकीत तब्बल ५५०० मते घेणारे सुनील शेट्ये, मनसेचे स्थानिक शाखाध्यक्ष लवू नर, तसेच माजी नगरसेविका प्रणिता वाघधरे यांची भूमिका या आगामी महापालिका निवडणुकीत निर्णायक ठरणार आहे.
थोडक्यात, कांबळे यांच्या प्रवेशामुळे भाजपसाठी ही डोकेदुखी ठरली असली तरी ते महायुती धर्म निभावतील की स्वतंत्र लढतीचा पर्याय स्वीकारतील, यावरच वार्ड क्रमांक 173 चे राजकीय भवितव्य ठरणार आहे.
