मुंबई, दि. ७ : अजय मगरे
भारताचे संविधान निर्माता भारतरत्न डॉ. बाबासाहेब आंबेडकर यांच्या स्मृतीला समर्पित दादर येथील इंदू मिलमधील भव्य स्मारक आणि पुतळा उभारणीच्या कामाचा आढावा सामाजिक न्याय मंत्री संजय शिरसाट यांनी आज घेतला. या बैठकीस आनंदराज आंबेडकर, सामाजिक न्याय विभागाचे प्रधान सचिव डॉ. हर्षदीप कांबळे तसेच संबंधित अधिकारी उपस्थित होते.
या वेळी मंत्री शिरसाट म्हणाले, “समुद्रकिनाऱ्यालगत उभारले जाणारे हे स्मारक डॉ. आंबेडकरांच्या विचारांचे भव्य प्रतीक ठरणार आहे. पुतळा उभारणीसंबंधी शिल्पकार राम सुतार यांनी दिलेल्या महत्त्वपूर्ण सूचनांचा विचार करण्यात आला असून त्या संबंधित विभागांना कळविण्यात आल्या आहेत. तांत्रिक बाबींवर विशेष लक्ष देत काम कालबद्ध पद्धतीने सुरू आहे.”
मंत्री शिरसाट यांनी पुढे सांगितले की, “डॉ. बाबासाहेब आंबेडकर स्मारकाचे काम डिसेंबर २०२६ पर्यंत पूर्ण करण्याचा मानस असून सर्व विभागांना त्या दृष्टीने नियोजनबद्धपणे काम करण्याचे निर्देश देण्यात आले आहेत.”
या बैठकीत स्मारक परिसरातील सुविधा, प्रवेशद्वार, सभागृह, संग्रहालय आणि पुतळ्याच्या उंचीबाबतही चर्चा झाली. लवकरच उभारणीच्या पुढील टप्प्यांवर काम सुरू होणार असल्याची माहितीही यावेळी देण्यात आली.
