केंद्रीय मंत्री नितीन गडकरी व पशुसंवर्धन मंत्री पंकजा मुंडे यांच्यात नवी दिल्ली येथे बैठक
मुंबई, दि. ७ : अजय मगरे
विदर्भातील ११ आणि मराठवाड्यातील आठ जिल्ह्यांमध्ये दुग्धविकासाला नवे बळ मिळणार आहे. नॅशनल डेअरी डेव्हलपमेंट बोर्ड (एनडीडीबी) आणि मदर डेअरीच्या सहकार्यातून या भागात दुग्धविकास प्रकल्पाचा दुसरा टप्पा राबविण्यात येणार आहे. केंद्रीय रस्ते वाहतूक व महामार्ग मंत्री नितीन गडकरी आणि राज्याच्या पशुसंवर्धन मंत्री पंकजा मुंडे यांच्यात नवी दिल्लीत झालेल्या बैठकीत या प्रकल्पासंदर्भात महत्त्वपूर्ण निर्णय घेण्यात आला.
या बैठकीत शेतकऱ्यांना दूध संकलन, चारा लागवड आणि दुधाळ जनावरांच्या संख्यावाढीसाठी प्रोत्साहन देण्यावर भर देण्यात आला. राज्याचे पशुसंवर्धन सचिव एन. रामास्वामी, आयुक्त प्रवीणकुमार देवरे, एनडीडीबीचे चेअरमन डॉ. शहा तसेच प्रकल्प संचालक डॉ. बोरानी व डॉ. श्रीधर उपस्थित होते.
या प्रकल्पाद्वारे मराठवाड्यातील दुधाळ जनावरांची उत्पादकता वाढविणे, उच्च दर्जाच्या गाई-म्हशींचे वितरण, तसेच पशु पूरक खाद्य, फॅट व एसएनएफ वर्धक पदार्थांचा पुरवठा करण्यात येणार आहे. याशिवाय बहुवार्षिक चारा पिकांसाठी विशेष अनुदान, विद्युत चलित कडबाकुट्टी यंत्रांचे वाटप आणि दूध व्यवसायाचे प्रशिक्षण देण्यात येईल. या माध्यमातून ग्रामीण भागात स्वयंरोजगाराला चालना मिळून शेतकऱ्यांचे उत्पन्न वाढविण्याचे उद्दिष्ट आहे.
बीड जिल्ह्यातील विकास कामांसंदर्भात मागणीपत्र
बीड जिल्ह्यातील विविध विकास कामांसह अतिवृष्टीमुळे झालेल्या नुकसानीबाबत उपाययोजना करण्यासाठी मंत्री पंकजा मुंडे यांनी केंद्रीय मंत्री नितीन गडकरी यांना पत्र सादर केले. गडकरी यांनी या मागण्यांना सकारात्मक प्रतिसाद दिला.
दरम्यान, सावरगाव घाट येथे झालेल्या दसरा मेळाव्याच्या निमित्ताने पंकजा मुंडे यांनी नितीन गडकरी यांचा राष्ट्रसंत भगवान बाबा यांच्या मूर्तीद्वारे सत्कार केला.
