सोयाबीनचे दर ही समाधानकारक नाहीत.
कोपरगांव, दि.६ : दीपक साटोटे
कोपरगांव कृषी उत्पन्न बाजार समितीत आज कांद्याची मोठ्या प्रमाणात आवक झाली असली तरीही दरात कोणतीही समाधानकारक वाढ न झाल्याने शेतकरी वर्गात नाराजीचे वातावरण पसरले आहे.
आज बाजार समितीत ८८३२ क्विंटल उन्हाळ कांद्याची आवक झाली असून, त्याला किमान ४०० ते कमाल १४०० रुपये दरम्यान भाव मिळाला. सर्वसाधारण दर सुमारे ११०० रुपये प्रतिक्विंटल इतका होता. कांद्याच्या अत्यल्प दरामुळे अनेक शेतकरी हवालदिल झाले आहेत.
पावसाळ्यात कांदा साठवणे कठीण असल्याने शेतकऱ्यांनी मोठ्या अपेक्षेने कांदा बाजारात आणला होता. मात्र प्रतिक्विंटल २५०० ते ३००० रुपये भाव मिळावा अशी अपेक्षा असताना प्रत्यक्षात भाव कोसळल्याने शेतकरी वर्गाला आर्थिक फटका बसला आहे.
सोयाबीनबाबत बोलायचे झाले, तर ३२ क्विंटल आवक झाली असून त्याला किमान ४६२९ ते कमाल ४७१४ रुपये, आणि सरासरी ४६७५ रुपये प्रतिक्विंटल असा दर मिळाला. सध्या सोयाबीनचे दर स्थिर असले तरीही दरवाढ होणार की नाही याबाबत अनिश्चितता आहे. शेतकऱ्यांनी सोयाबीनसाठी किमान ५००० रुपये दर मिळावा अशी मागणी केली आहे.
इतर शेतमालाचे दर पुढीलप्रमाणे : गहू: ८० क्विंटल आवक, दर २६४९ ते २७०० रुपये, सरासरी दर २६८० रुपये
हरभरा: १ क्विंटल आवक, दर ५९२१ रुपये…
मका: १ क्विंटल आवक, दर २५०० रुपये…
ज्वारी व बाजरी: कोणतीही आवक नाही…
बाजार समितीत शेतमाल विक्री व्यवस्थेबाबत अनेक शेतकऱ्यांनी असमाधान व्यक्त केले असून, भाववाढीसाठी उपाययोजना कराव्यात, अशी मागणी ते करत आहेत. कांद्याच्या आणि सोयाबीनच्या दरात लवकरच सुधारणा होईल, अशी शेतकऱ्यांची अपेक्षा आहे.
