मुंबई, दि. ३ : अजय मगरे
मुख्यमंत्री देवेंद्र फडणवीस यांच्या अध्यक्षतेखाली आज पार पडलेल्या राज्य मंत्रिमंडळ बैठकीत ठाणे वर्तुळाकार मेट्रो प्रकल्प, पुणे आणि नागपूर मेट्रो प्रकल्पांच्या विस्तारीत टप्प्यांसाठी आवश्यक कर्ज घेण्यास मान्यता देण्यात आली.
या निर्णयानुसार ठाणे वर्तुळाकार मेट्रो प्रकल्प, पुण्यातील पिंपरी-चिंचवड ते निगडी, स्वारगेट ते कात्रज, वनाज ते चांदणी चौक, रामवाडी ते वाघोली (विठ्ठलवाडी) या मार्गिका तसेच पुणे मेट्रो मार्ग-४ (खडकवासला–स्वारगेट–हडपसर–खराडी) आणि नळ स्टॉप वारजे–माणिकबाग (उपमार्गिका) या प्रकल्पांसाठी तसेच नागपूर मेट्रो रेल्वे टप्पा–२ साठी आवश्यक निधी उभारणीसाठी राज्य शासनाने पुढाकार घेतला आहे.
यापूर्वीच या सर्व मेट्रो प्रकल्पांना मान्यता मिळाली होती. आजच्या निर्णयातून या प्रकल्पांसाठी घेण्यात येणाऱ्या कर्जाची जबाबदारी शासनाने स्वीकारली असून त्यासाठी आवश्यक करार करण्यासही मंजुरी देण्यात आली आहे.
या प्रकल्पांसाठी द्वीपक्षीय, बहुपक्षीय वित्तीय संस्था किंवा अन्य बँकांकडून सुलभ व्याजदरावर कर्ज घेण्यात येईल. त्याची मुद्दल, व्याज आणि शुल्क यांची परतफेड संबंधित प्रकल्पांना करावी लागणार आहे. आवश्यकतेनुसार राज्य शासन हमी देखील देणार आहे.
राज्यातील मेट्रो जाळे अधिक सशक्त करण्यासाठीचा हा निर्णय अत्यंत महत्त्वाचा ठरणार असून, ठाणे, पुणे आणि नागपूरकरांना आगामी काळात अधिक सुलभ, जलद व सुरक्षित प्रवासाचा लाभ होणार आहे.
