पुणे, भोर.दि.२४ : ( सतिश गायकवाड )
पुणे जिल्ह्यातील भोर तालुक्यातील अतिदुर्गम डोंगरी भाग असलेल्या कोंढरी गावातील कुमारी आदिती पारठे (इयत्ता ७ वी) हिला अमेरिकेतील नामांकित अंतराळ संशोधन संस्था ‘नासा’ला भेट देण्यासाठी निवड झाली आहे. देशभरातून निवड झालेल्या केवळ २५ विद्यार्थ्यांमध्ये आदितीचा समावेश झाल्याने संपूर्ण परिसरात आनंदाचे आणि अभिमानाचे वातावरण आहे.
आदितीचे वडील मजुरी करून कुटुंबाचा उदरनिर्वाह करतात. “आमच्या आख्ख्या खानदाण्यात कुणी विमानतळ जवळूनही पाहिलेलं नाही. पण आमच्या घरातील मुलगी आज विमानात बसून सातासमुद्रापार जाणार आहे, याचा आम्हाला प्रचंड आनंद आहे,” अशी भावना कुटुंबीयांनी व्यक्त केली. “आदितीला आमच्यासारखं मजूर न होता मोठं व्हायचं आहे. तिने मेहनत आणि जिद्दीने हा टप्पा गाठला आहे,” असे सांगताना ते भावुक झाले.
आदितीच्या या यशामुळे कोंढरीसह भोर तालुक्याचा लौकिक वाढला आहे. ग्रामीण भागात राहूनही सातत्याने शिक्षणात प्रगती करत आदितीने मिळवलेले यश केवळ गावासाठी नव्हे, तर सर्वांसाठी प्रेरणादायी ठरत आहे.
