मुंबई, दि.२४ : मंगेश म्हात्रे
मुंबई महापालिकेच्या निवडणुकीच्या तोंडावर प्रतीक्षा नगरमध्ये झालेलं शिवसेना (ठाकरे गट) आणि मनसेचं संयुक्त आंदोलन राजकीय वर्तुळात चर्चेचा विषय ठरत आहे. खड्ड्यांच्या प्रश्नावरून कंत्राटदाराला खड्ड्यात बसवून जाब विचारणाऱ्या या आंदोलनाने स्थानिक पातळीवर ठाकरे गट आणि मनसे कार्यकर्त्यांची ताकद दाखवून दिली आहे.
गेल्या काही दिवसांपासून मुसळधार पावसामुळे प्रतीक्षा नगर परिसरातील रस्त्यांवर प्रचंड खड्डे निर्माण झाले आहेत. या समस्येकडे महापालिकेचं दुर्लक्ष झाल्याचा आरोप करीत मनसे शाखाध्यक्ष लवू नर आणि ठाकरे गटाचे वाहतूक सेनेचे पदाधिकारी विशाल आमकर यांच्या नेतृत्वाखाली कार्यकर्त्यांनी जोरदार आंदोलन केले. कंत्राटदाराला प्रतीकात्मकरीत्या खड्ड्यात बसवून जाब विचारण्यात आला.
मुंबई महापालिकेची प्रभाग रचना जाहीर होण्याच्या पार्श्वभूमीवर झालेलं हे संयुक्त आंदोलन केवळ रस्त्यांच्या खड्ड्यापुरतं मर्यादित नसून, आगामी निवडणुकांसाठीचा राजकीय प्रयोग मानला जात आहे. ठाकरे गट आणि मनसे युतीबाबत अद्याप अधिकृत घोषणा झालेली नसली, तरी कार्यकर्त्यांच्या एकत्रित हालचालींनी संभाव्य युतीला गती मिळू शकते, अशी चर्चा सुरू झाली आहे.
महायुतीकडून भाजप-शिंदे गट एकत्रितपणे निवडणूक लढवणार असताना ठाकरे गट आणि मनसेचे स्थानिक पातळीवरील आंदोलन महायुतीसाठी आव्हानात्मक ठरू शकते. उद्धव ठाकरे आणि राज ठाकरे एकत्र आले, तर मराठी मतांचे समीकरण बदलून मुंबई महापालिकेत सत्तांतर घडविण्याची शक्यता राजकीय जाणकार वर्तवू लागले आहेत.
खड्ड्यांवरून सुरू झालेला संघर्ष, प्रत्यक्षात महापालिकेतील राजकीय खड्डे बुजवण्याचा प्रयत्न असल्याचं भाष्य राजकीय वर्तुळात होत आहे.
