मुंबई,दि.२६ : अजय मगरे
पुण्याचे माजी महापौर व राष्ट्रवादी काँग्रेसचे शहराध्यक्ष प्रशांत जगताप यांनी प्रदेशाध्यक्ष हर्षवर्धन सपकाळ यांच्या उपस्थितीत काँग्रेस पक्षात प्रवेश केला. यावेळी त्यांच्या सोबत अनेक पदाधिकाऱ्यांनीही काँग्रेसमध्ये प्रवेश केला. आगामी महापालिका निवडणुकांच्या पार्श्वभूमीवर हा प्रवेश काँग्रेससाठी बळ देणारा मानला जात आहे.
यावेळी बोलताना हर्षवर्धन सपकाळ म्हणाले, “लोक उगवत्या सूर्याला नमस्कार करतात; मात्र जगताप यांनी वैचारिक लढ्यासाठी काँग्रेसचा मार्ग निवडला.” विधिमंडळ काँग्रेस पक्षाचे नेते विजय वडेट्टीवार यांनी जगताप हे विचारांशी तडजोड न करणारे नेते असून अनेक ऑफर धुडकावून काँग्रेसमध्ये आले असल्याचे सांगितले.
टिळक भवनमध्ये झालेल्या कार्यक्रमास काँग्रेसचे वरिष्ठ नेते व पदाधिकारी उपस्थित होते. तसेच, नगरपालिका निवडणुकीत विजयी झालेल्या ४१ काँग्रेस नगराध्यक्षांचा यावेळी भव्य सत्कार करण्यात आला.
