मुंबई, दि. ४ : मंगेश म्हात्रे
म्हाडाच्या मुंबई इमारत दुरुस्ती व पुनर्रचना मंडळातर्फे प्रतिक्षा नगर, सायन येथील संक्रमण शिबिर आवारात विशेष वृक्षारोपण मोहीम राबवण्यात आली. या उपक्रमाचा शुभारंभ मंडळाचे सहमुख्य अधिकारी उमेश वाघ यांच्या हस्ते करण्यात आला.
वृक्षारोपण प्रसंगी उपमुख्य अधिकारी मोहन बोबडे, मिळकत व्यवस्थापक प्रभाकर म्हसाळ यांच्यासह मंडळाचे अधिकारी व कर्मचारी मोठ्या संख्येने उपस्थित होते. या उपक्रमात विविध प्रकारच्या झाडांचे रोपण करून पर्यावरण संवर्धनाचा महत्त्वाचा संदेश देण्यात आला.
वाढत्या शहरीकरणाच्या पार्श्वभूमीवर हरित परिसराचे जतन करणे अत्यंत आवश्यक आहे, याची जाणीव ठेवून मंडळामार्फत ही मोहीम राबवण्यात आली. अशा उपक्रमांमुळे परिसरात हरित आच्छादन वाढण्यास मदत होणार असून नागरिकांमध्ये पर्यावरणाबाबत जनजागृती होण्यास देखील हातभार लागणार आहे.
