शिर्डीत २० एप्रिलपासून आमरण उपोषणाचा इशारा
राहता,दि.३१ ( दिलीप गायकवाड )
तालुक्यातील पिंपळवाडी ग्रामपंचायत हद्दीत सुरू असलेल्या अनधिकृत व विनापरवाना वीटभट्ट्यांविरोधात छावा क्रांती सेनेने आक्रमक भूमिका घेतली आहे. या बेकायदेशीर वीटभट्ट्या तात्काळ बंद न केल्यास २० एप्रिलपासून शिर्डी येथील अप्पर जिल्हाधिकारी कार्यालयासमोर बेमुदत अमरण उपोषण आंदोलन छेडण्यात येणार असल्याचा इशारा ‘छावा क्रांती सेना’ संघटनेचे अहिल्यानगर जिल्हाध्यक्ष अविनाश शिंदे यांनी दिला आहे.
याबाबत जिल्हाधिकारी कार्यालयाला निवेदन देण्यात आले असून, पिंपळवाडी परिसरात सुरू असलेल्या वीटभट्ट्या अनधिकृत असून त्यांना कोणतीही परवानगी नसल्याचा आरोप करण्यात आला आहे. या वीटभट्ट्यांमुळे परिसरातील पर्यावरण आणि स्थानिक नागरिकांच्या आरोग्यावर विपरीत परिणाम होत असल्याचेही निवेदनात नमूद करण्यात आले आहे.
यापूर्वी दि. ६ मार्च २०२६ रोजी जिल्हाधिकाऱ्यांना निवेदन देण्यात आले होते, तसेच १ मार्च २०२६ रोजी अप्पर जिल्हाधिकारी कार्यालयाकडून पत्रव्यवहारही करण्यात आला होता. मात्र त्यानंतरही संबंधित विभागांकडून कोणतीही ठोस कारवाई झालेली नसल्याचा आरोप छावा क्रांती सेनेने केला आहे.
प्रशासनाने तातडीने हस्तक्षेप करून पिंपळवाडी परिसरातील अनधिकृत वीटभट्ट्या कायमस्वरूपी बंद कराव्यात, अन्यथा आंदोलन अधिक तीव्र करण्यात येईल, असा इशाराही शिंदे यांनी दिला आहे.
दरम्यान, प्रशासनाने या प्रश्नाकडे गांभीर्याने लक्ष न दिल्यास २० एप्रिल रोजी सकाळी ११ वाजल्यापासून शिर्डी येथील अप्पर जिल्हाधिकारी कार्यालयासमोर बेमुदत अमरण उपोषण शांततेत सुरू करण्यात येणार असल्याचे निवेदनात नमूद करण्यात आले आहे.
