मुंबई मेट्रो लाईन-५ च्या कामात ऐतिहासिक टप्पा पार;
अंजुरफाटा येथे ६५ मीटर ‘ओपन वेब गर्डर’ यशस्वीरित्या बसवला
मुंबई, १५ एप्रिल (प्रतिनिधी) — मुंबई महानगर प्रदेश विकास प्राधिकरणाने (MMRDA) मुंबई मेट्रो लाईन-५ (ठाणे–भिवंडी–कल्याण) प्रकल्पाच्या पहिल्या टप्प्यात एक ऐतिहासिक कामगिरी बजावली आहे. भिवंडीतील अंजुरफाटा येथे मध्य रेल्वेच्या वसई-दिवा मार्गावर ६५ मीटर लांबीचा आणि ४५६ मेट्रिक टन वजनाचा ओपन वेब गर्डर (OWG) यशस्वीरित्या बसवण्यात आला.
ही कामगिरी तीन टप्प्यांत पूर्ण करण्यात आली. चालू रेल्वे मार्ग आणि वर्दळीच्या महामार्गावर अचूकतेने आणि नियोजित वेळेत केलेले हे काम उच्च दर्जाच्या अभियांत्रिकी कौशल्याचे प्रतीक मानले जात आहे. गर्डर सुमारे २० मीटर उंच व्हायाडक्टवर, मेट्रो खांब P328 ते P329 दरम्यान बसवण्यात आला.
या कामात मध्य रेल्वे प्रशासन आणि वाहतूक पोलिसांचे योग्य समन्वय लाभला. रेल्वे ब्लॉकच्या ठरवलेल्या वेळेत गर्डर बसविण्याची प्रक्रिया यशस्वीपणे पार पडली.
हा महत्त्वाचा टप्पा पूर्ण झाल्यामुळे लाईन ५ च्या पुढील कामांना गती मिळणार असून, संपूर्ण प्रकल्प नियोजित वेळेत पूर्ण करण्याचा मार्ग मोकळा झाला आहे.
ही कामगिरी एकात्मिक भावना, काटेकोर नियोजन आणि उत्कृष्ट अभियांत्रिकी यांचे मूर्त स्वरूप ठरली आहे. MMRDA च्या या यशामुळे मुंबई मेट्रोचा विकास आणखी वेग घेणार आहे.
