कोपरगाव वकील संघातर्फे उषाताई पवार यांचा सत्कार
कोपरगाव, दि. २ : दिलीप गायकवाड
“मनात प्रचंड जिद्द आणि कठोर परिश्रम करण्याची तयारी असेल, तर कोणतीही प्रतिकूल परिस्थिती आपल्या मार्गात अडथळा ठरू शकत नाही,” असे गौरवोद्गार कोपरगाव वकील संघाच्या महिला उपाध्यक्षा ॲड. सोनल पोळ यांनी व्यक्त केले.
कोपरगाव येथील उषाताई पवार यांची नुकतीच पोलीस उपअधीक्षक म्हणून झालेल्या नियुक्तीनिमित्त कोपरगाव वकील संघातर्फे त्यांचा सत्कार करण्यात आला.
या प्रसंगी उपस्थितांना मार्गदर्शन करताना उषाताई पवार म्हणाल्या की, “अत्यंत प्रतिकूल परिस्थिती असूनही मनाशी ठाम निर्धार केला की प्रशासकीय सेवेत जायचेच. अनेक वेळा अपयश आले, पण हार मानली नाही. सातत्याने परिश्रम घेत राहिले आणि आज त्या प्रयत्नांचे चीज झाले.”
त्या पुढे म्हणाल्या, “मला मिळालेल्या या संधीचा उपयोग समाजातील सर्वसामान्य नागरिकांना न्याय मिळवून देण्यासाठी करणार आहे.”
या कार्यक्रमाला वकील संघाच्या माजी महिला उपाध्यक्षा ॲड. ज्योती भुसे, ॲड. करुणा सोनवणे, ॲड. स्वाती मैले, तसेच महिला वकील सदस्य उपस्थित होत्या. सत्कार सोहळा उत्साहात पार पडला असून, उषाताई पवार यांच्या यशाचा गौरव संपूर्ण कोपरगावात व्यक्त होत आहे.
