लालपरी’ला नवा आर्थिक वेग – प्रताप सरनाईक यांची माहिती
मुंबई : अजय मगरे
राज्याच्या कानाकोपऱ्यात धावणारी ‘लालपरी’ आता केवळ प्रवाशांची सेवा न करता महसूलवाढीचेही नवे चाक फिरवणार आहे. पुढील पाच वर्षांत जाहिरातींच्या माध्यमातून महाराष्ट्र राज्य मार्ग परिवहन महामंडळ (एसटी) ला तब्बल २५० कोटी रुपयांपेक्षा अधिक उत्पन्न मिळणार असल्याची माहिती परिवहन मंत्री तथा एसटी महामंडळाचे अध्यक्ष प्रताप सरनाईक यांनी दिली.
एसटी मुख्यालयात झालेल्या ३१० व्या संचालक मंडळ बैठकीत ते बोलत होते. बैठकीस परिवहन आयुक्त राजेश नार्वेकर, एसटीचे उपाध्यक्ष व व्यवस्थापकीय संचालक डॉ. माधव कुसेकर, सहायक कामगार आयुक्त पल्लवी सहारे यांच्यासह सर्व खातेप्रमुख उपस्थित होते.
मंत्री सरनाईक म्हणाले, “एसटीची २५१ आगारे आणि ६१० हून अधिक बसस्थानके राज्यभर कार्यरत आहेत. सुमारे १२ हजार बसेस दररोज ५० ते ५५ लाख प्रवाशांची ने-आण करतात. भविष्यात बससंख्या वाढल्यानंतर ही संख्या १ कोटींपर्यंत जाण्याची शक्यता आहे. इतक्या व्यापक पोहोच असलेल्या माध्यमावर जाहिरात देणे म्हणजे उत्पादकांसाठी मोठी संधी आहे.”
बसस्थानके, त्यांचा परिसर, बसेसच्या आतील व बाहेरील भाग तसेच उपलब्ध संसाधनांचा प्रभावी वापर करून जाहिरात महसूल वाढविण्याचा आराखडा तयार करण्यात आला आहे. स्पर्धात्मक निविदा प्रक्रियेद्वारे पुढील पाच वर्षांसाठी २५० कोटी रुपयांहून अधिक महसूल देणारी निविदा स्वीकारण्यात आल्याचे त्यांनी स्पष्ट केले.
सध्या जाहिरातींद्वारे दरवर्षी सुमारे २२ कोटी रुपयांचे उत्पन्न मिळते. नव्या निविदेमुळे या उत्पन्नात दुपटीपेक्षा जास्त वाढ होणार आहे. तिकीट विक्रीव्यतिरिक्त पर्यायी स्रोतांमधून उत्पन्न वाढल्यास एसटीला आर्थिक स्थैर्य मिळेल, असा विश्वासही सरनाईक यांनी व्यक्त केला.
