ठाणे,दि.८.( प्रतिनिधी )
ठाणे पोलीस आयुक्तालय हद्दीत वाढत्या जबरी चोरी आणि बसमधील प्रवाशांच्या मौल्यवान वस्तू चोरीच्या घटनांचा तपास करत गुन्हे शाखा घटक-१ ने मोठी कारवाई केली आहे. या कारवाईत दोन सराईत पुरुष आरोपी आणि दोन महिला आरोपींना अटक करण्यात आली असून त्यांच्याकडून तब्बल ₹५२.३४ लाख किमतीचे ३२ तोळे सोन्याचे दागिने, ५ मोटारसायकली, १ अग्नीशस्त्र, १ जिवंत काडतूस आणि १ धारदार चाकू जप्त करण्यात आला आहे.
अटक करण्यात आलेल्या आरोपींमध्ये सऊद सिराज खान उर्फ सऊद काळ्या (२५) आणि स्वप्नील हरीश माधवानी उर्फ बाबू अरखट्या (२०) यांचा समावेश आहे. तसेच बस प्रवासादरम्यान प्रवाशांच्या मौल्यवान वस्तू चोरणाऱ्या संगीता दशरथ पीठकर (४५) व सुरेखा बजरंग गायकवाड (४७) या महिला आरोपींनाही अटक करण्यात आली आहे.
तपासादरम्यान आरोपींकडून ठाणे, मुंबई, नवी मुंबई आणि पुणे पोलीस आयुक्तालय क्षेत्रातील एकूण २४ गुन्हे उघडकीस आले आहेत. आरोपी सऊद सिराज खान याच्याविरुद्ध यापूर्वी एमपीडीए (MPDA) अंतर्गत कारवाई करण्यात आली होती. तो फरार असल्याने न्यायालयाने त्याच्याविरुद्ध प्रोक्लेमेशन ऑर्डर देखील जारी केली होती. अखेर गुन्हे शाखेने त्याला अटक करण्यात यश मिळवले.
या कारवाईत कळवा, चितळसर, नारपोली, नौपाडा, मुंब्रा, ठाणे नगर, तुर्भे, उरण, टिळकनगर तसेच पुणे जिल्ह्यातील वडगाव मावळ पोलीस ठाण्यांमध्ये दाखल असलेले विविध चोरी, जबरी चोरी व शस्त्र बाळगण्याचे गुन्हे उघडकीस आले आहेत.
मा. पोलीस सहआयुक्त (गुन्हे) पंजाबराव उगले, मा. पोलीस उपआयुक्त (गुन्हे) अमरसिंह जाधव आणि सहाय्यक पोलीस आयुक्त शेखर बागडे यांच्या मार्गदर्शनाखाली वरिष्ठ पोलीस निरीक्षक सचिन गायकवाड व त्यांच्या पथकाने ही उल्लेखनीय कामगिरी केली.
