अभिनेते सयाजी शिंदे यांच्या आंदोलनाला पाठिंबा
कोपरगाव, दि.९ : दिलीप गायकवाड
नाशिकमधील तपोवन परिसरातील प्रस्तावित वृक्षतोडीचा निषेध करण्यासाठी कोपरगाव येथील गौतामाई प्रतिष्ठान ट्रस्टच्या वतीने वृक्षप्रेमी समाधान कंदे यांनी अनोखी पुढाकार घेत कोपरगाव–नाशिक असा शेकडो मैलांचा सायकल प्रवास सुरू केला आहे. तपोवनातील वृक्ष तोडू नका, हा ठाम संदेश घेऊन ते थेट नाशिककडे रवाना झाले.
समाधान कंदे यांनी दि. ९ डिसेंबर रोजी डॉ. बाबासाहेब आंबेडकर सार्वजनिक वाचनालय, कोपरगाव येथून या सायकल मोहिमेला सुरुवात केली. तपोवनातील पर्यावरणीय समतोल राखण्यासाठी व मोठ्या प्रमाणावरील वृक्षतोड थांबविण्यासाठी हा उपक्रम राबवल्याचे त्यांनी सांगितले.
अभिनेते सयाजी शिंदे तपोवनातील वृक्षसंवर्धनासाठी लढा देत आहेत, त्यांना ठाम समर्थन देण्यासाठी हा प्रवास सुरू केल्याचे समाधान कंदे यांनी स्पष्ट केले. “तपोवनातील एकही वृक्ष तोडला जाऊ नये, नैसर्गिक वारसा वाचवणे ही आपली सामूहिक जबाबदारी आहे,” अशी भूमिका त्यांनी व्यक्त केली.
समाधान कंदे यांच्या या उपक्रमाचे परिसरात कौतुक होत असून पर्यावरणविरोधी निर्णयांना विरोध करण्यासाठी युवक पुढे येत असल्याचे सकारात्मक उदाहरण म्हणून या मोहिमेकडे पाहिले जात आहे
