लोककला–अभिजात नृत्य संवर्धनातील कार्याला मानाचा मुजरा
मुंबई, दि.२ अजय मगरे
महाराष्ट्र शासनाच्या सांस्कृतिक कार्य विभागातर्फे जाहीर झालेल्या २०२५ सालच्या महाराष्ट्र राज्य युवा सांस्कृतिक पुरस्कारासाठी प्रसिद्ध भरतनाट्यम शिक्षिका व लोककला संशोधक तेजस्विनी चव्हाण-आचरेकर यांची निवड झाली आहे. सांस्कृतिक क्षेत्रातील त्यांच्या सातत्यपूर्ण योगदानाची दखल घेत हा मानाचा पुरस्कार जाहीर करण्यात आला आहे. एक लाख रुपये, मानपत्र आणि सन्मानचिन्ह असे या पुरस्काराचे स्वरूप आहे.
सौ. आचरेकर या अनेक वर्षांपासून भरतनाट्यमचे प्रशिक्षण, संशोधन आणि सृजनशील सादरीकरण यांसाठी कार्यरत आहेत. महाराष्ट्रातील लोककला, लोकपरंपरा आणि विधीनाट्यांचे अभ्यास–दस्तावेजीकरण या क्षेत्रात त्यांनी महत्त्वपूर्ण संशोधन केले असून त्यांच्या ‘शब्दवेध’, ‘गोंधळ’, ‘बोहाडा’ आणि ‘महाराष्ट्राची विधीनाट्ये’ ही चार पुस्तके शासन प्रकाशित आहेत. राज्यातील प्रयोगशील कलाविश्वावर त्यांनी विविध वृत्तपत्रे आणि मासिकांतून प्रभावी लेखनही केले आहे.
भारतीय अभिजात भरतनाट्यमबरोबरच त्यांनी लोकनृत्यांचे सादरीकरण राष्ट्रीय आणि आंतरराष्ट्रीय व्यासपीठांवर केले असून त्यांच्या प्रयोगांना व्यापक प्रशंसा मिळाली आहे. सध्या त्या मुंबई विद्यापीठातून पीएच.डी. संशोधन कार्य करीत आहेत. तरुण पिढीत नृत्यकलेची अभिरुची वाढावी, तसेच लोककलांचा वारसा जतन व्हावा यासाठी त्यांनी राबविलेले विविध उपक्रम राज्यभर कौतुकास्पद ठरले आहेत.
या निर्णयाचे कलाविश्वात स्वागत झाले असून, सांस्कृतिक कार्य विभागामार्फत पुरस्कार वितरण सोहळा लवकरच पार पडणार आहे.
