शिर्डी,दि.२२.दिलीप गायकवाड
शिर्डी येथे बेकायदेशीर विटभट्ट्यांविरोधात छावा क्रांतिवीर सेनेने सुरू केलेले बेमुदत अमरण उपोषण अखेर प्रशासनाच्या आश्वासनानंतर स्थगित करण्यात आले.
अहिल्यानगर जिल्ह्यातील शिर्डी येथील अप्पर जिल्हाधिकारी कार्यालयासमोर संघटनेचे जिल्हाध्यक्ष अविनाश अशोक शिंदे यांनी दि. २० रोजी आंदोलन सुरू केले होते. आंदोलनाचा आज दुसरा दिवस होता.
राहाता तालुका तहसील कार्यालयातील नायब तहसीलदारांनी आंदोलनस्थळी भेट देऊन पिपळवाडी येथील विनापरवाना सुरू असलेल्या बेकायदेशीर विटभट्ट्यांबाबत सविस्तर चर्चा केली. या चर्चेनंतर तहसीलदार अमोल मोरे यांनी एक महिन्याच्या आत संबंधित विटभट्ट्यांवर कारवाई करण्यात येईल, असे लेखी आश्वासन दिले.
प्रशासनाकडून मिळालेल्या या आश्वासनानंतर आंदोलनकर्त्यांनी आपले उपोषण स्थगित करण्याचा निर्णय घेतला. यावेळी आंदोलनस्थळी उपस्थितांना पाणी देत शांततेत आंदोलन मागे घेण्यात आले.
या प्रसंगी संघटनेचे पदाधिकारी व कार्यकर्ते मोठ्या संख्येने उपस्थित होते.
