मुंबई | मंगेश म्हात्रे
माहीम येथील मच्छिमार कॉलनीच्या समूह पुनर्विकासाबाबत राज्य शासन सकारात्मक असून लवकरच अंतिम निर्णय घेतला जाईल, अशी माहिती मंत्री शंभूराज देसाई यांनी विधान परिषदेत दिली. उपमुख्यमंत्री व गृहनिर्माण मंत्री एकनाथ शिंदे यांच्या अध्यक्षतेखाली बैठक घेऊन यासंदर्भातील प्रस्तावावर अंतिम निर्णय घेण्यात येणार असल्याचे त्यांनी स्पष्ट केले.
विधान परिषद सदस्य प्रसाद लाड यांनी माहीम परिसरातील मच्छिमार कॉलनीतील इमारत क्रमांक १ ते २०, पोलीस वसाहतीतील इमारत क्रमांक १ ते २५, तसेच परिसरातील चार स्वायत्त वसाहती आणि म्हाडा कॉलनीचा क्लस्टर पद्धतीने पुनर्विकास करण्याची मागणी केली होती. या भागातील इमारती जीर्ण अवस्थेत असून नागरिकांना मूलभूत सोयीसुविधांचा अभाव जाणवत असल्यामुळे स्थानिकांकडून पुनर्विकासाची मागणी सातत्याने होत आहे.
मंत्री देसाई यांनी सांगितले की, प्रकल्पास विलंब होत असल्याबाबत तक्रारी प्राप्त झाल्यानंतर म्हाडा उपाध्यक्षांच्या अध्यक्षतेखाली बैठक घेऊन पुनर्विकासाचा प्रस्ताव सादर करण्याच्या सूचना देण्यात आल्या आहेत. प्रस्ताव प्राप्त झाल्यानंतर बृहन्मुंबई व उपनगरांतील २० एकर किंवा त्यापेक्षा अधिक क्षेत्रफळाच्या म्हाडा अभिन्यासांचा समूह पुनर्विकास करण्याबाबत धोरण निश्चित करण्यात आले आहे.
या चर्चेत सदस्य सुनील शिंदे, प्रवीण दरेकर, अनिल परब यांच्यासह संबंधित अधिकाऱ्यांनी सहभाग घेतला. माहीम मच्छिमार कॉलनीच्या पुनर्विकासाबाबत शासन सकारात्मक असून लवकरच ठोस कार्यवाही केली जाईल, असे आश्वासनही यावेळी देण्यात आले.
