मुंबई : मंगेश म्हात्रे
म्हाडामध्ये अधिकाऱ्यांच्या बदल्यांची मालिका सुरू असून नव्या नियुक्त्यांमुळे प्रशासनातील ‘क्रीम पोस्टिंग’चा मुद्दा पुन्हा एकदा चर्चेत आला आहे. महत्त्वाच्या विभागांमध्ये काही अधिकाऱ्यांना पुन्हा संधी मिळाल्याने म्हाडा वर्तुळात जोरदार चर्चा रंगू लागल्या आहेत.
मुंबई झोपडपट्टी सुधार मंडळाच्या पश्चिम विभागाचे कार्यकारी अभियंता अभय रामटेके यांच्या जागी आर. आर. बोर्डाच्या एफ वॉर्डमध्ये कार्यरत असलेले कार्यकारी अभियंता राकेश धनवटे यांची नियुक्ती करण्यात आली आहे. विशेष म्हणजे धनवटे यांची स्लम बोर्डात ही चौथ्यांदा नियुक्ती असल्याने त्यांच्या पुनरागमनाची चर्चा म्हाडा प्रशासनात रंगली आहे.
दुसरीकडे, इमारत परवाना कक्षातील उपअभियंता अमोल बुधकोंडवार यांची बदली आर. आर. बोर्डात करण्यात आली असून त्यांच्या जागी स्लम बोर्डातून भावेश गायकर यांची नियुक्ती झाली आहे. इमारत परवाना कक्ष ही म्हाडातील महत्त्वाची आणि ‘क्रीम पोस्ट’ म्हणून ओळखली जाणारी जागा असल्याने गायकर यांच्या नियुक्तीकडेही सर्वांचे लक्ष लागले आहे.
याच बदल्यांमध्ये स्लम बोर्डातील शाखा अभियंता शंकर सूर्यवंशी यांना पदोन्नती देत इमारत परवाना कक्षात संधी देण्यात आली आहे. काही अधिकाऱ्यांना महत्त्वाच्या जबाबदाऱ्या मिळाल्या, तर काहींची इतर विभागांत रवानगी झाल्याने या बदल्यांमागील समीकरणांवर म्हाडाच्या प्रशासकीय वर्तुळात चर्चा सुरू झाली आहे.
