ठाणे, दि. ३०.( प्रतिनिधी )
शेतकरी कामगार पक्षाचे ठाणे शहर अध्यक्ष ऋषिकेश तायडे यांनी दिलेल्या माहितीनुसार, गुजरातमधून महाराष्ट्रात खासगी प्रवासी बसमधून सीटखाली लपवून संशयित भेसळयुक्त माव्याची अवैध वाहतूक होत असल्याची माहिती पक्षाला मिळाली. त्यानंतर तायडे यांनी कार्यकर्त्यांसह घटनास्थळी धाव घेत अन्न व औषध प्रशासन (FDA) अधिकाऱ्यांना माहिती दिली.
FDAच्या अधिकाऱ्यांनी फाउंटन हॉटेल परिसरात संबंधित खासगी बसांची तपासणी केली. या कारवाईत अंदाजे २ ते ३ टन संशयित भेसळयुक्त मावा जप्त करण्यात आला असून पुढील तपास आणि आवश्यक कायदेशीर कारवाई सुरू आहे.
यावेळी ऋषिकेश तायडे यांनी महाराष्ट्रातील नागरिकांच्या आरोग्याशी खेळ करणाऱ्यांविरोधात शेतकरी कामगार पक्ष सातत्याने लढा देईल, अशी भूमिका मांडली. भेसळयुक्त अन्नपदार्थांची अवैध वाहतूक व विक्री रोखण्यासाठी संबंधित यंत्रणांशी समन्वय साधून कठोर कारवाईसाठी पाठपुरावा सुरू ठेवण्यात येईल, असे त्यांनी सांगितले.
तसेच नागरिकांनी त्यांच्या परिसरात भेसळयुक्त अन्नपदार्थांची निर्मिती, साठवणूक, वाहतूक किंवा विक्रीबाबत संशयास्पद माहिती आढळल्यास ती तात्काळ प्रशासनाला कळवावी, असे आवाहनही त्यांनी केले.
