पुणे : प्रतिनिधी
पुणे शहरातील औंध, बाणेर, पाषाण आणि शिवाजीनगर परिसरातील वाहतूक कोंडी कमी करण्यासाठी सुमारे २७७ कोटी रुपये खर्चून १ हजार ७६३ मीटर लांबीचा एकात्मिक दुमजली उड्डाणपूल उभारण्यात आला आहे. या पुलामुळे परिसरातील वाहतूक अधिक सुरळीत होण्यास मोठी मदत होणार आहे.
या प्रकल्पासाठी केंद्रीय मंत्री नितीन गडकरी यांच्या सहकार्याने अजित पवार यांनी सातत्याने पाठपुरावा केल्याचे मान्यवरांनी सांगितले. तसेच पुणे-शिरूर, हडपसर-यवत, तळेगाव-चाकण-शिक्रापूर आणि नाशिक फाटा-खेड-राजगुरुनगर या महत्त्वाच्या रस्ते प्रकल्पांनाही गती मिळाली आहे.
राज्याच्या अर्थसंकल्पात पायाभूत सुविधांसाठी २१ टक्क्यांची वाढ करण्यात आली असून पुण्यासाठी मेट्रोच्या पुढील टप्प्यांना मंजुरी, रामवाडी-वाघोली मेट्रो, येरवडा-कात्रज भुयारी मार्ग आणि विविध रस्त्यांचे सहापदरीकरण यांसारख्या प्रकल्पांमुळे पुण्याच्या विकासाला वेग मिळणार असल्याचेही सांगण्यात आले.
कार्यक्रमाला उपमहापौर परशुराम वाडेकर, माजी आमदार सुनील टिंगरे, स्थायी समिती अध्यक्ष श्रीनाथ भिमाले, मुख्य अभियंता रियाज पठाण तसेच नागरिक मोठ्या संख्येने उपस्थित होते.
