आनंद विश्व गुरुकुल ज्येष्ठ रात्र महाविद्यालयाच्या विद्यार्थ्यांची खेलो इंडिया युनिव्हर्सिटी गेम्समध्ये दमदार कामगिरी….
ठाणे, दि. २ : अजय मगरे
खेलो इंडिया युनिव्हर्सिटी गेम्स २०२५ या राष्ट्रीय पातळीवरील प्रतिष्ठित स्पर्धेत मुंबई विद्यापीठाच्या बॅडमिंटन संघाने रौप्य पदकाची कमाई करत पुन्हा एकदा आपली छाप उमटवली. या चमकदार यशात आनंद विश्व गुरुकुल ज्येष्ठ रात्र महाविद्यालयाचे दोन विद्यार्थी अभ्युदय चौधरी आणि झाकूओ सेई यांनी महत्त्वाची भूमिका बजावली.
स्पर्धेत उत्कृष्ट लय साधत मुंबई विद्यापीठाने मणिपूर विद्यापीठ, एम.जी. विद्यापीठ (केरळ) आणि एस.आर.एम. विद्यापीठ (आंध्र प्रदेश) यांना पराभूत करत थेट अंतिम फेरी गाठली. अखेरच्या सामन्यात कठोर प्रतिस्पर्ध्यांशी झुंज देत संघाने रौप्य पदकावर शिक्कामोर्तब केले.
संघाचे मार्गदर्शन मुंबई विद्यापीठाचे मॅनेजर व कोच प्रा. सुशांत दिवेकर यांनी सांभाळले. त्यांच्या तंत्रशुद्ध प्रशिक्षणामुळे आणि खेळाडूंनी दाखवलेल्या समन्वयामुळे या स्पर्धेत संघाचे प्रदर्शन उठून दिसले.
या उल्लेखनीय यशाबद्दल शारदा एज्युकेशन सोसायटीचे अध्यक्ष विलास ठूसे, सचिव प्रा. डॉ. प्रदीप ढवळ, महाविद्यालयाच्या प्राचार्या डॉ. हर्षला लिखीते, तसेच सर्व शिक्षक व शिक्षकेत्तर कर्मचारी यांनी खेळाडूंना मनःपूर्वक शुभेच्छा दिल्या. महाविद्यालयातील विद्यार्थ्यांनीही अभ्युदय आणि झाकूओ सेई यांच्या कामगिरीचा गौरव करत पुढील राष्ट्रीय स्पर्धांसाठी शुभेच्छा दिल्या.
