छत्रपती संभाजीनगर,दि.६ ( प्रतिनिधी )
छत्रपती संभाजीनगर महानगरपालिकेतील स्वीकृत नगरसेवकपदासाठी उद्धवसेनेला एक जागा मिळण्याची शक्यता व्यक्त होत असून, या पदासाठी पक्षांतर्गत इच्छुकांमध्ये चुरस वाढली आहे. एकाच जागेसाठी तब्बल आठ जणांनी दावेदारी केल्यामुळे राजकीय हालचालींना वेग आला आहे.
या पदासाठी युवासेनेचे हनुमान शिंदे, रोहन आंचलिया, लक्ष्मीनारायण बाखरिया, कमलाकर जगताप, अश्फाक कुरेशी, सचिन वाघ, चेतन कांबळे आणि गोपाल कुलकर्णी यांची नावे पुढे आली आहेत. सर्व इच्छुकांनी पक्षश्रेष्ठींकडे आपापली ताकद दाखवण्यास सुरुवात केली असून, स्थानिक पातळीवर लॉबिंगही वाढल्याचे दिसून येत आहे.
दरम्यान, महानगरपालिकेत स्वीकृत नगरसेवकपदासाठी आवश्यक असलेला ११ नगरसेवकांचा गट तयार करण्यासाठी उद्धवसेना वंचित बहुजन आघाडी आणि राष्ट्रवादी काँग्रेस (शरद पवार गट) यांच्यासोबत समन्वय साधत आहे. या पार्श्वभूमीवर राजकीय घडामोडींना वेग आला असून, लवकरच याबाबत अंतिम निर्णय होण्याची शक्यता वर्तवली जात आहे.
सूत्रांच्या माहितीनुसार, सर्व इच्छुकांना ‘मातोश्री’वर बोलावून पक्षप्रमुखांकडून अंतिम निर्णय जाहीर केला जाणार आहे. त्यामुळे या निवडीकडे सर्वांचे लक्ष लागले आहे.
