पैठण,दि.३ ( अभिजीत सोनवणे )
प्राथमिक आरोग्य केंद्रा अंतर्गत येणाऱ्या हर्षी आरोग्य उपकेंद्रात आरोग्य कर्मचारी उपस्थित राहत नसल्याने रूग्णांची मोठी गैरसोय होत आहे.
या आरोग्य उपकेंद्रा अंतर्गत हर्षी बुद्रुक, हर्षी खुर्द,सोनवाडी खुर्द,सोनवाडी बुद्रुक,दादेगाव खुर्द,दादेगाव बुद्रुक या सहा गावांचा समावेश आहे.
येथे एक आरोग्य सेवक व एक आरोग्य सहाय्यीका असे दोन कर्मचा-यांची नियुक्ती असुन गेल्या अनेक दिवसांपासून एकच आरोग्य सहाय्यीका या आरोग्य उपकेंद्राचा भार सांभाळत आहे.
सदरील आरोग्य सहाय्यीकावर दावरवाडी आरोग्य उपकेंद्र, थेरगाव उपकेंद्र,नांदर येथील उपकेंद्राचा अतिरिक्त कार्यभार सांभाळत असुन यामुळे सहा गावांतील रूग्णांची मोठी गैरसोय होत आहे.
या आरोग्य उपकेंद्रात फक्त २६ जानेवारी ,१५ ऑगस्ट,१ मे,१७ सप्टेंबर या दिवशीच कर्मचारी उपस्थित राहत असल्याने परिसरातील रूग्णांना पाचोड किंवा पैठण या ठिकाणी खाजगी रूग्णालयात उपचार घ्यावे लागत असुन ग्रामीण भागातील नागरिकांना आर्थिक अडचणींचा सामना करावा लागतो.असे येथील सामाजिक कार्यकर्ते दादासाहेब आगळे यांनी सांगितले.
येत्या दोन दिवसांत या आरोग्य उपकेंद्रात आरोग्य कर्मचारी उपस्थित न राहिल्यास हर्षी आरोग्य उपकेंद्रा समोर आमरण उपोषणाचा इशारा दादासाहेब आगळे यांनी दिला आहे.
प्रतिक्रिया :-
डॉ.समाधान पाचोडे (वैद्यकीय अधिकारी नांदर प्राथमिक आरोग्य केंद्र):- नांदर प्राथमिक आरोग्य केंद्रा अंतर्गत सहा आरोग्य उपकेंद्र असुन सध्या तिनं आरोग्य सहाय्यीका व चार आरोग्य सेवकांची पदे रिक्त आहे.वरिष्ठांकडे या विषयावर लेखी स्वरूपात कळविण्यात आले असून लवकरच ही पदे भरण्यात येणार असून येणाऱ्या काळात अशी गैरसोय होणार नसल्याचे त्यांनी सांगितले.
