कोपरगाव : दिलीप गायकवाड
कोपरगाव तालुक्यातील जेऊर कुंभारी ग्रामपंचायत हद्दीतील ब्रँच कॅनॉललगत असलेल्या भानुदास शामराव वक्ते यांच्या शेतातील विहिरीत रविवारी रात्रीच्या वेळी एक जिवंत बिबट्या पडल्याची घटना उघडकीस आली. वन विभागाने तत्परता दाखवत बिबट्याची सुखरूप सुटका केली.
भानुदास वक्ते हे सकाळी शेतात फेरफटका मारण्यासाठी गेले असता, विहिरीत डोकावून पाहिल्यानंतर त्यांना पाण्यात पडलेला बिबट्या दिसला. बिबट्या विहिरीतील विद्युत मोटार पंपाला धरून जीव वाचविण्याचा प्रयत्न करत होता. यानंतर वक्ते यांनी तातडीने ग्रामस्थ, पोलिस आणि वन विभागाला माहिती दिली.
घटनेची माहिती मिळताच कोपरगाव पोलीस ठाण्याचे अधिकारी आणि वन विभागाचे कर्मचारी घटनास्थळी दाखल झाले. वन विभागाने पाण्यात विशेष पिंजरा व बचाव साहित्य सोडून बिबट्याला सुरक्षितरीत्या बाहेर काढले. त्यानंतर त्याला पुढील कार्यवाहीसाठी वन विभागाच्या ताब्यात घेण्यात आले.
बिबट्याला पाहण्यासाठी परिसरातील नागरिकांनी मोठी गर्दी केली होती. वन विभागाच्या वेळीच केलेल्या बचाव मोहिमेमुळे बिबट्याचा जीव वाचला असून, कोणतीही अनुचित घटना घडली नाही.
